amalinks wokungena

Breaking News

'Uhulumende Kalungise Uhlupho Lwabodokotela Ukwenzela Ukuthi Abantu Belatshwe Ngemfanelo'


Striking doctors in Zimbabwe

Isimo sibi ezibhedlela zikahulumende okulabodokotela asebelenyanga phose ezine bekhalala umsebenzi bekhonona ngeholo eliphansi lokuswelakala kwemithi lemitshina yokuhlola izigulane.

Abalezihlobo ezigulayo ezibhedlela zikahulumende bathi akuthembisi ukuthi isimo lesi sizaguquka ngomnyaka ozayo.

Abantu kwele Zimbabwe bathi kabasoze bekhohlwe okwenzakale lonyaka ezibhedlela zikahulumende okulabodokotela abakhalala umsebenzi abanye babo abafika phose amakhulu amane lengxenye abaxotshwa umsebenzi besetheswa amacala okubaleka emsebenzini.

Odokotela abathuthukayo lokhu betshaya phansi ngenduku besithi kababuyeli emsebenzini uhulumende engakalungisi okubahluphayo.

Bathi isimo esibi somnotho yiso esabenza bakhalala umsebenzi hatshi ukuthi benza santando. Okwamanje balutshwana kakhulu odokotela abelapha abantu njalo akulamithi yokwelapha izigulane.

Isakhamuzi sakoBulawayo,uMnu Eden Mgcini, uthi ukuswelakala kwemithi ngokunye okwenza kubelokuxokozale ezibhedlela zikahulumende.

UNkosikazi Nosizo Tshuma uthi ukuswelakala kwabodokotela kwenze ukuthi abhekane lohlupho olukhulu ukuze umtanakhe athole usizo ngokuphangisa esibhedlela sikahulumende koBulawayo.

“Mina esidini lami ngihlangane leproblem enzima emtwaneni, akade ezithwele. So, wasesiya eNkulumane clinic, basebesithi umtwana sekakele esiswini ngcono agijinyiswele empilo safika lapha empilo bakhangela basebesithi iproblem le ayikho eyokuthi ukakele esiswini. Hayi kubenzima umtwana esephelelwa ngamandla, sengisenza okokudinga ngisithi ngicela lingisize umtwana sephelelwa ngamandla njalo lomtwana kasadlali kuhle.

“Bona bathi hayi ukuthi agijinyiselwe ku operation akwenzi ngoba kulabantu aba urgent abavele befuna ukusizwa masinyane, ngimile ukuthi umtwana aze a operatwe.”

Kusobala ukuthi ukukhalakhala kwabodokotela ngokuswelakala kwemithi kuliqiniso ngoba lezigulane zizibonele okwehlela abantu abadinga uncedo. UNkosikazi Melisa Sithole uthi okuhlupha kakhulu ezibhedlela zikahulumende yikuswelakala kwemithi obesokuyinhlalayenza.

Abantu abanengi bafisa ukuthi odokotela babuyele emsebenzini. Okunye njalo bathi ukubhidlika kwezibhedlela zikahulumende kuvezwa yikudla okuphekelwa izigulane. Omunye wabakhala ngalokhu nguNkosikazi Sithokozile Nyirenda.
“Ngibona angani kungaba ngcono nxa singathola odokotela on a daily basis njalo besiphe lemithi leprogress ukuthi umtwana usenjani. Okwakhathesi sengisebenzise imali engange $400 ngingasabali imithi lokudla ngoba idiet ekhona eMpilo for abantwana hayi ayenzi, bathi abantwana abatshileyo bafuna iprotein enengi kakhulu. Sokuyabe sekumele ngithenge egedini ukudla okuleprotein amaqanda lenyama, phakathi yikhabitshi wayawaya .

Abanye abanjengo Nkosikazi Marget Maphosa baphila ngokunatha amaphilisi okwelapha iHigh Blood Pressure. Amaphilisi la kawasatholakali ezibhedlela zikahulumende. UNkosikazi Maphosa uthi kuzwisa usizi ukuthi ubethola amaphilisi la kodwa okwamanje kuyehlula.

Kulabanye njalo abathwele nzima ekudingeni imithi lokunye okufunakala ezibhedlela nxa izihlobo zabo ezigulayo zingabonwa ngudokotela. UNkosikazi Linda Sibindi uthi uhlutshwa yikudinga amasakanyana esigulane okumele siwasebenzise ukuya ngaphandle.

Odokotela bathi kababuyeli emsebenzini ngakho kuzaqhubekela phambili ukuhlupheka kwabantu abafisa ukwelatshwa eZimbabwe.

Omele odokotela abakhalala umsebenzi bekunhlanganiso yeZimbabwe Hospital Doctors’ Association, uDokotela Mthabisi Bhebhe, uthi akwaziwa ukuthi bazabuyela nini emsebenzini. UDokotela Solwayo Ngwenya, umqondisi wenhlelo ezitshiyeneyo eMpilo Central Hospital, uthi bazamile ukusebenza labodokotela abangakhalalanga umsebenzi.

UDokotela Paulinus Sikosana, umgcinisihlalo wenhlanganiso eqhatsha odokotela eyeHealth Service Board, walile ukukhuluma ngodaba lolu esithi kakho emsebenzini okwamanje. Kasenelisanga ukukhuluma loDokotela Obadiah Moyo, umphathintambo wezempilakahle obengaphenduli umakhalekhukhwini wakhe.

Kuzaba Lenguquko Na Kwezempilakahle eZimbabwe Ngomnyaka Ozayo?
please wait

No media source currently available

0:00 0:06:17 0:00


Facebook Forum

XS
SM
MD
LG