amalinks wokungena

'Ukusebenza Nzima Yikho Okwenze Sanqoba Iqembu leSri Lanka'

  • Joseph Njanji

Abadlali bekhilikithi beZimbabwe bathi banqobe ngenxa yokusebenza gadalala ...

Amalunga eqembu elimela ilizwe emdlalweni kakhilikithi athi ukusebenza kanzima yikho okukhokhele ukuba leliqembu linqobe ele Sri Lanka emncintiswaneni we One Day International.

Iqembu le Zimbabwe linqobe ele Sri Lanka nge 3 ka 2 kumncintiswano we One Day International ofike emaphethelweni ngoMvulo khonale elizweni le Sri Lanka njalo lokhu ngokwakuqala kusukela ngomnyaka ka 2009 ukuba iqembu le Zimbabwe linqobe lidlala lingekho ngekhaya.

Umqeqetshi ofundisa abadlali ukutshaya ibhola ibatting uLance Klusener utshele inhlanganiso kamabonakude we Supersport ukuba ukunqoba kweqembu le Zimbabwe kuze ngemva kokuba belungiselele kuhle phambilini kokuyadlala kwabo kwele Sri Lanka.

“Ngiyakujabulela okwenziwe ngabafana. Basebenze kakhulu phambilini kokuza kwethu lapha njalo basebenzise wonke amasu esawahlela sisazilolonga, lakanye kwaphuma njengokulungiselela kwethu.”

Umqeqetshi weqembu le Zimbabwe uHeath Streak uthe ngemva kokuphiwa umsebenzi lo wathembisa ukuba uzasebenza labadlali abatshengisa ukuba lomdlandla njalo omunye wabadlali abatshengise ukuba balakho ukuphakamisa iqembu le Zimbabwe nguSolomon Mire yena odlale indima enkulu ekunqobeni kweqembu leli.

“Bekuyisimo esitsha kimi lesi kodwa indlela engidlale ngayo izakwenza ukuba ngizethembe kakhulu emidlalweni elandelayo.”

UMire utshaye ama runs edlula ikhulu emdlalweni wakuqala leqembu le Sri Lanka mhla zingamatshumi amathathu kunyanga kaNhlolanja njalo lokhu kuphathise iqembu le Zimbabwe ukuba linqobe ele Sri Lanka okwakuqala kumdlalo wohlobo lwe ODI kudlalelwa khonale kwele Sri Lanka.

UMire ndawonye lo Hamilton Masakadza yibo abatshaye ibhola kakuhle babuthelela inani elithe xaxa lama runs okwenze kweneliseka ukuba iqembu le Zimbabwe ledlule inani lama runs angamakhulu amabili lantathu ebelibuthelelwe liqembu le Sri Lanka njalo uMasakadza uthi badlale ngaloluhlobo ngoba kuyikho abakade bekwenza ngesikhathi bezilolonga bengakaphakami ukuya kwele Sri Lanka.

“Kulamaqhinga ambalwa esiwalolonge sisasekhaya lomqeqetshi wethu we batting njalo la ngagoqela isweep shot yona esisebenzele kakhulu kulumdlalo.”

Kumidlalo emihlanu edlalwe phakathi kweqembu le Zimbabwe lele Sri Lanka iqembu le Zimbabwe linqobe kumdlalo wakuqala ngama wicket ayisithupha, ele Sri Lanka linqobe kumdlalo wesibili ngama wickets ayisikhombisa kanye lakowesithathu ngama wickets ayithoba minwe mbili kwathi ele Zimbabwe linqobe kumdlalo wesine ngama wickets amane ikanti kowesihlanu linqobe ngama wickets amathathu.

Limpumela icaphule kakhulu abalandeli beqembu le Sri Lanka ngoba iqembu le Zimbabwe lihlezi endaweni yetshumi lanye kungalane yamaqembu adlala umdlalo kakhilikithi njalo belihlezi lingumthatshuzwa nje eminyakeni edluleyo.

Lawa amaqembu ayadibana njalo ngoLwesihlanu emdlalweni wohlobo lwe Test wona okumele udlalwe phakathi kwensuku ezinhlanu.

Facebook Forum

XS
SM
MD
LG