amalinks wokungena

Breaking News

Umthethwandaba Unika uChiwenga Isikhatshana Sokuthi Abisele Abantwana Kumkakhe uMarry Mubaiwa


UMarry Mubaiwa ungena enkantolo yeHarare Magistrate Court, Zimbabwe, Dec. 16, 2019. (Columbus Mavhunga/VOA)

Umthethwandaba ngoLwesihlanu uthe umsekeli kamongameli, uRetired General Constantino Chiwenga, kumele avumele umkakhe uMarry Mbaiwa ukuthi ahlale endlini yabo njalo amnike abantwana ngokutshetsha.

Umahluli wedale leHigh Court, uJustice Christopher Dube Banda, unike uChiwenga amahola amabili ukuba ahambise abantwana bakhe abathathu kukhosikazi lakhe okumele ahlale endlini yabo eBorrowdale Brooke eHarare.

uJustice Dube uphinde wathi kumele uChiwenga anike ikhosikazi lakhe imota abazisebenzisayo loba ababili laba belwisana okumangalisayo emthethwandaba.

Akwaziwa ukuba uChiwenga ukwenzile lokhu ngesikhathi esibekwe ngumahluli wenkantolo yeHigh Court.

UJustice Dube uphinde wathi kumele uChiwenga abisele konke akuthatha kubhizimusi lika Marry Mubaiwa eyeOrchid Gardens eseDomboshava lapho asebenzisa khona imota zamasotsha ukuthwala impahla etshiyeneyo.

UChiwenga uphiwe amahola angamatshumi amabili lane ukuba abisele impahla le.

Inkantolo iphinde yathatha isinqumo sokuthi kumele uChiwenga abisele uMarry Mubaiwa imota ezintathu owayezisebenzisa engakabotshwa njalo ahlawule amagqwetha omkakhe.

UMarry Mubaiwa ubemelwe nguMnu. Taona Nyamakura loAdvocate Lewis Uriri.

UChiwenga uthi umkakhe wayefuna ukumbulala ngesikhathi egula esesibhedlela kwele South Africa njalo wayefuna ukuphekapheka amaphepha omtshado ukwenzela ukuba athathe impahle yonke nxa uChiwenga engabhubha.

Wetheswa njalo amacala okusebenzisa imali enengi phandle kwelizwe okungekho emthethweni.

UMarry Mubaiwa utshele umthethwandaba ukuba uChiwenga kenelisi ukugcina abantwana ngoba unatha amaphilisi amenza engaphili kahle.

Kodwa-ke uChiwenga uthi ngamanga la ngoba uMarry Mubaiwa uthanda ukunatha izidakamizwa lokunye okumenza engacabangi kahle.

Kubikwa ukuthi uChiwenga usephanyeke udaba lolu enkantolo yeSupreme Court.

Facebook Forum

XS
SM
MD
LG