Uhulumende usevumile ukuthi uselungisisa ezinye izibhedlela ezimbili eHarare ukuba zilungele ukwelapha abantu abagula umkhuhlane weCoronavirus COVID-19.
Kodwa uzulu uthi ukungaphumeli egcekeni kukahulumende kuveza ukuba engabe ebelungiselela iziphathamandla labangane babo izibhedlela lezi.
Uhulumende uvume lokhu ngemva kwemibiko ephume enkundleni zokuxhumana ezitshiyeneyo okuvezwe ukuthi uhulumende usesakha isibhedlela eHarare lapho okuzakwelatshwa khona inkokheli yebandla leZANU PF elomkhuhlane weCoronavirus COVID-19.
Kodwa uhulumende uyakuphika lokhu ngombiko awethule enkundleni yeTwitter ekhasini lomsakazo weZBC esithi isibhedlela lesi sizakwelapha wonke umuntu njalo inkampani yeSakunda Holdings eqondiswa nguMnu. Kudakwashe Tagwirei, yiyo ezaphathisa ngoncedo lokulungisisa lezi zibhedlela.
Kodwa izakhamizi zeHarare ezifana loMnu. Walter Siginya zithi uhulumende akumelanga abe lenkethabetshabi ngoba umkhuhlane weCoronavirus kawulani lombala loba isimo somuntu.
“Abantu siyafana sonke. Akufuzanga ukuthi abalemali beme bodwa abangela mali bame bodwa. Nxa sekugulwa umkhuhlane munye, umuthi munye, odokotela bayafanana nje.”
Lokhu kusekelwe ng Mnu Nixon Nyikadzino unobhala kuMDC-T ekhokhelwa nguNkosazana Thokozani Khuphe.
“Udubo esilalo yikuthi uhulumende kasilaleli. Into yokwakha isibhedlela sabantu abathile kayenzi. Sifuna ukuba befake imali endaweni zonke, eMasvingo, eBeitbridge, eGwanda. Abakwenza yikufuna ukutshontsha imali.”
UMnu. Normal Dube isakhamuzi seHarare uthi okuqakathekileyo okwamanje yikuthi uzulu azivikela ngokuhlala amakhaya ephila impilo elokuhlanzeka kulokumelela ukuya esibhedlela.
“Thina esikwenzayo yikuthi sengathenga ibhakede elilempompi, ukuthi abantwana bageze izandla. Asisanathi amanzi empompini. Umuntu engaphuma esambuzini kumele ageze izandla.”
Kasenelisanga ukukhuluma loMnu. Obediah Moyo umphathintambo wezempilakahle kodwa ugatsha lwakhe lutshele umsakazo weZBC ukuba isibhedlela esilungisiswa yiSakunda Holdings sizanceda ukwelapha uzulu wonke.
Inkampani ye Sakunda Holdings, ethengisa amafutha ezimota, ithi izafaka imali enhlanganisweni eyeRock Foundation lesibhedlela seSt. Annes yokuncedisa uhulumende emizameni yokulwisana lomkhuhlane weCoronavirus.
Kuyakuthi kufika ngoLwesithathu ngeviki ezayo esisodwa salezizibhedlela sibikwa siyabe sesilungele ukuphathisa abayabe sebelomkhuhlane.
Ele Zimbabwe libhekane lobunzima besimo esibi ezibhedlela ngoba uhulumende useleminyaka ethile engabeli imali eneleyo kumsebenzi wezempilakahle, ikakhulu khathesi sokubhekwane lokumemetheka komkhuhlane weCOVID-19 osubulele abantu abanengi emhlabei wonke jikelele.