amalinks wokungena

Breaking News

Izigulane Sezibiselwa Emakhaya Ngesikhathi Odokotela Bekhalala Umsebenzi eZimbabwe


Odokotela abakhalala umsebenzi batshengisela phandle kwesinye isibhedlela eZimbabwe.
Odokotela abakhalala umsebenzi batshengisela phandle kwesinye isibhedlela eZimbabwe.

Isimo sibi kakhulu ezibhedlela kwele Zimbabwe okulabodokotela abaqhubekela phambili bekhalala umsebenzi elizweni lonke besithi kababuyeli ezibhedlela kungakatholakali uDokotela Peter Magombeyi, othunjwe ngabantu abangaziwayo ngempelaviki.

Izibhedlela ezinengi elizweni ezigoqela eseMpilo, United Bulawayo Hospitals, Parirenyatwa, Harare lezinye, kazemukeli izigulane okwenza ukuthi abantu abadinga uncedo bathwale nzima.

Kubikwa ukuthi abantu abanengi sebebuyela emakhaya ukuyabhekana lokufa ngoba akulamadokotela ezibhedlela zikahulumende. Abanengi bathi kabenelisi ukuhlawula imali efunwa ngodokotela abazimele bodwa.

Uhulumende uthi lokhu edinga uDokotela Magombeyi, ongomunye wabantu abafika phose amatshumi amathathu, abathunjwe lonyaka kwele Zimbabwe.

UDokotela Magombeyi ukunhlanganiso yeZimbabwe Hospital Doctors’ Association elamalunga akhalala umsebenzi ekhonona ngeholo eliphansi. Odokotela abasathuthukayo bahola amadola angamatshumi amane – US$40 – ngenyanga.

Abanye abantu bathi ukuswelakala kwabodokotela kwenza ukuthi babukele izihlobo labangane bedela impilo loba bayabe belemikhuhlane eyalephekayo.

Isakhamuzi sakoBulawayo, uNkosikazi Senzeni Msipha, uthi ubemele abone udokotela kodwa uthole engasebenzi.

“Bengisesibhedlela namuhla eMpilo (Hospital) ngoba bengibhalelwe ekilinika ukuthi ngihambe ngiyebona udokotela. Ngivimbene. Ngithe sengifika ngale esibhedlela ngathola odokotela bengasebenzi. Kubanzima kithi ngoba impilakahle yethu isisengozini. Angikwazi ukuthi umkhuhlane engilawo uqhubeka usiyangaphi … Besicela uhulumende akhangele izikhalazo zabodokotela ukuze lathi sinakekelwe benelise ukusisiza ngoba sesisengozini.”

Omunye wabongi esibhedlela seMpilo koBulawayo, uNkosikazi Jecki Maseko, uthi akusasebenzeki odokotela bengekho.

‘‘Umsebenzi ususibanzima ngoba sisebenza ndawonye labodokotela kodwa okwakhathesi abakho emsebenzini. Asikwazi ukuthi bazaphenduka nini. Uhlupho olukhona yikuthi sisebenza sikhawule kweyinye indawo. Asenelisi ukuthi thina sihlinze abantu. Abasengozini kakhulu ngomama ababeletha ngeC Section. Asenelisi ukuthi sibancede.’’

UNkosikazi Nancy Ncube, okewaya esibhedlela seUnited Bulawayo Hospitals, uthi kalutholanga usizo esibhedlela ngoba odokotela kade bengekho emsebenzini.

“Besiye kureview lomtanami eUBH waqamuka ingalo. Kodwa ngiyadana kakhulu ngoba sithole odokotela bengekho. Khathesi lemali zokuya kumaprivate surgery asilayo ngoba bayabe befuna amadola eMelika esingawaholiyo. Khathesi kunje umtwana ngizamenzani, kumele akhangelwe ngudokotela. Uhulumende kabe lozwelo labantu bakhe angenele.”

Odokotela bakubeke sobala ukuthi ababuyeli emsebenzini kuze kutholakale uDokotela Magombeyi othunjwe ngempelaviki.

please wait

No media source currently available

0:00 0:03:18 0:00
XS
SM
MD
LG