Umkhokheli webandla eliphikisayo elePeople’s Democratic Party (PDP), uMnu. Tendai Biti, uthi ibandla lakhe seliqalisile ukukhetha abantu abazancintisa belimele kukhetho lokudinga amalunga edale lephalamende ngomnyaka ozayo.
Ekhuluma ngaphambilini komhlangano wokwethula abantu laba eHarare ngoLwesibili, uMnu Biti, uveze ukuthi sebethole ingxenye yabantu abazancintisa ezikhundleni zokudinga abammeli bedale lephalamende, lona elilamalunga angamakhulu amabili letshumi 210.
Lanxa singenelisanga ukuthola wonke amabizo abantu asebekhethwe libandla lePDP, abalolwazi ngokwenzakalayo bathi omunye wabo ngolwela amalungelo oluntu uNkosazana Linda Masarira.
UBiti uthe inyathelo asebelithethe leli kalisoze liphambanise imizamo yokumanyaniswa kwamabandla aphikisayo ngaphambilini kokhetho.
Wengeze wathi ukuze ukhetho luqhutshwe ngendlela ezasuthisa wonke umuntu, kumele uhulumende avumela abantu abavela kunhlanganiso ezifana leUnited Nations, iSouthern African Development Community leAfrican Union (AU) bazebona ngokuqhutshwa kwalolukhetho.
Uthe njalo ikomishini ebona ngokuqhutshwa kokhetho iZimbabwe Electoral Commission (ZEC) kumele idilizwe ibunjwe kakutsha.
Umbono kaBiti usekelwe ngumgcinisihlalo webandla lakhe uNkosikazi Lucia Matibenga yena othe kabayithembi iZEC.
UNkosikazi Matibenga uthe njalo ibandla lakhe lizaqhubeka likhankasela ukuthi izizalwane zeZimbabwe ezihlala kwamanye amazwe zivunyelwe ukuvota.