amalinks wokungena

Breaking News

Iqhubekela Phambili Ingxabangxoza Yebandla leZanu PF


UNkosikazi Joice Mujuru usethwele nzima labanye bakhe.

Iqhubekela phambili ingxabangxoza kubandla leZanu PF lapho osokulokugedla kwamazinyo kulabo abacatshangelwa ukuthi basekela icele elikhokhelwa ngumsekeli kamongameli welizwe, uNkosikazi Joice Mujuru, abavalelwe ngabasekela elinye icele ukuthi bangene kudale leCentral Committee.

Omunye walabo ababikwa beyaliswe ukuncintisa izikhundla kudale leli nguMnu. Nicholas Goche umphathintambo wezezisebenzi, lowaxotshwa esikhundleni somgcinisihlalo wesabelo seMashonaland Central, uMnu. Themba Mliswa.

UMliswa ubikwa evotelwe ngabantu abanengi ukuthi angene kudale leli kodwa watshelwa ukuthi akumelanga adinge isikhundla kuCentral Committee ngoba esanda kukhitshwa esikhundleni esiphezulu sebandla leli.

Kuthi-ke uGoche ubikwa ethwaliswe nzima ngabasakhulayo eBindura lapho atshengise ukuthi ufuna ukungena kudale leli.

Abazi ngokwenzakeleyo bathi uGoche ucine ekhalala esithi usediniwe ngokuxokozela okusebandleni leZanu PF. Wetheswa icala lokuzama ukugenqula umbuso kaMongameli Mugabe.

Uyakuphika konke lokhu esithi ngamanga aluhlaza tshoko akhulunywa ngabasekela icele lebandla elikhokhelwa nguMnu. Emmerson Mnangagwa umphathintambo wezemithetho ocatshangelwa ukuthi ufuna isikhundla sikaMongameli Mugabe oseluphele.

Abanye abathwele nzima ngokuzama ukungena kudale leCentral Committee elimela uzulu emhlanganweni ozayo oweCongress njalo elithatha izinqumo eziqakathekileyo zebandla bagoqela uMnu. Dzikamai Mavhaire umphathintambo wezomlilo otshiyeneyo, uMnu. Lazarus Dokora umsekeli womphathintambo wezemfundo ephansi, uMnu. Francis Nhema umphathintambo wezemvelo labanye abambalwa.

Bacatshangelwa ukuthi basekela icele lebandla leli elikhokhelwa nguMujuru okuthiwa lifuna ukukhipha uMugabe esikhundleli emhlanganweni weCongress owenziwa kunyanga ezayo.

Bayakuphika lokhu besithi kuphehlwa licele elikhokhelwa nguMnangagwa.

Ukuze sizwe okunengi ngalokhu njalo lokhetho lweCentral Committee, akesizwe uMnu. Joseph Tshuma omunye wabasekeli bebandla leZanu PF ekhuluma ngodaba lolu loGibbs Dube weStudio 7.

Ingcwethi kwezombusazwe uMnu. Dumisani Nkomo owenhlanganiso kazulu eyeHarbakuk Trust utshele iStudio 7 ukuthi labo abavalelwa ukungena kuCentral Committee balakho ukuthola ezinye izikhundla kungaphela umhlangano weCongress.

XS
SM
MD
LG