amalinks wokungena

Breaking News

Amankampani eZimbabwe Alakho Ukuthola Izikwelede kuEU Bank


Kudingakala izigidi eziyisikhombisa zamadollar- $7 million kusiyafika izigidi eziyisifica minwe mbili - $8 million yokuthuthukisa amankampani abhidlizwa yikuswela izikwelede zokulungisa impahla yokuthengisa. (File Photo)
EleZimbabwe libhekane lenhlupho ezinengi kulezinsuku ezigoqela ukuxokozela kwezombusazwe, ukuswelakala kwemali zokuthuthukisa amafekithali, imithetho eyesatshwa ngosomabhizimusi bemazweni lokunye okutshiyeneyo.

Amanye amankampani asedilikile endaweni ezinengi zelizwe ngenxa yokwehluleka ukuthola imali yokulungisa impahla yokuthengisa. Kodwa-ke kungani sokulethemba kancane lokuthi lokhu kungaguquka nxa ibhanga leEuropean Investment Bank linganika amankampani izikwelede zokulungisa impahla yokuthengisa.

Selifikile iqula leziphathamandla zebhanga leEuropean Investment Bank kwele Zimbabwe lapho elikhangelelwe ukuxoxisana leziphathamandla zikahulumende kanye labaqondisi bamankampani ngokubolekana imali.

Ingcwethi zenotho zithi kudingakala amabillion ayisikhombisa amadollar- $7 billion kusiyafika amabillion ayisifica minwe mbili - $8 billion yokuthuthukisa amankampani abhidlizwa yikuswela izikwelede zokulungisa impahla yokuthengisa.

Ibhanga leli lilakho ukuhlenga amanye amankampani la ngesikhathi umnotho welizwe uncipha ngenxa yokungatholi izikwelede ezitholakala emazweni athuthukileyo.
UMnu. Aldo Dell’Ariccia ummeli weEU eZimbabwe uthi iEuropean Investment Bank ilakho ukuhlenga amanye amankampani asebhidlika loba nje uhulumende angasoze athole lutho.

Uthi uhulumende ulezikwelede zebhanga leli ezifika izigidi ezingamakhulu amathathu amadollar eMelika - $300 million. Ilizwe lilezikwelede zamabhanga amakhulu anjenge International Monetary Fund le World Bank ezedlula amabillion ayisithupha amadollar eMelika - $6 billion.

UMnu. Bulisani Ncube usomabhizimusi wakoBulawayo uthi okubisela muva uhulumende weZimbabwe yikuthi kabhadali izikwelede.

UNcube uthi kumele eleZimbabwe lifunde ukubhadala izikwelede. Uthi lokhu kungenza lamankampani abelakho ukulungisa impahla ethe xaxa yokuthengisela uzulu elizweni lakwamanye amazwe.

Lokhu kusekelwa nguMnu. Percy Mcijo obona ngenhlelo ezimbalwa kunhlanganiso yeZimbabwe Congress of Trade Unions. Uthi ibhanga leEuropean Investment Bank liyabe lincede uhulumende nxa lingaboleka amankampani izikwelede zokuwathuthukisa.

UNcube ugcizelela esithi kumele eleZimbabwe lilungise njalo imithetho enjengomthetho wokwabela uzulu amashares amankampani emazweni olwe indigenization olwesatshwa ngosomabhizimusi bemazweni.

UNcube uphinde wathi okunye njalo okumele kukhangelwe yikuthi ababoleka osomabhizimisi imali bakhangelelwe ukuthi bayifake kwezokulima.

Lokhu kusekelwa nguMnu. David Hlabangane omunye wabalimi eZimbabwe othi imali le iyabe iqakatheke kakhulu ekuthuthukiseni umnotho welizwe osugugudeke okumangalisayo.

Ingcwethi zenotho zithi eleZimbabwe kumele lisebenzise isivumelwano elasenza ngomnyaka ka2009 le European Union esibizwa ngokuthi yiEconomic Partnership Agreement esenza ukuthi amankampani emzansi wezwekazi leAfrica athengise impahla emazweni aweE-U engabhadali imithelo enjenge Customs Duty.

Amanye amazwe akusivumelwano lesi aqoqela iMauritius, Madagascar leSychelles.
Ngaphandle kokudinga ezinye indlela zokuthuthukisa inotho yeZimbabwe ingcwethi lezi zithi umumo uzaqhubeka usiba mubi elizweni okwengezelelwa yikungathembeki lobuqili obukhona phakathi kweziphathamandla zikahulumende.
XS
SM
MD
LG