amalinks wokungena

Breaking News

Ibutho Lihluthuna Umbuso eZimbabwe


Ibutho leZimbabwe kukhanya selihluthune umbuso elizweni.

UMajor General Sibusiso Moyo wethule umbiko emsakazweni weZimbabwe Broadcasting Corporation ukuthi kabahluthunanga umbuso ngoba abakwenzayo yikulungisa okuhluphayo eZimbabwe.

Uthe uMongameli Robert Mugabe lemuli yakhe bephethwe kahle libutho elifuna ukususa abantu elithi ngamasela lezigilamkhuba ezifuna kuxotshwe kubandla leZanu PF abantu okuthiwa balandela uMnu. Emmerson Mnangagwa owaxotshwa esikhundleni nguMugabe.

Lokhu kulandela okwethulwe nguGeneral Constantino Chiwenga ngoMvulo othe ibutho kalisoze ligoqe izandla lekele ilizwe libhidlizwa ngabantu abangalwanga impi yenkululeko abafuna ukuzinothisa.

“Kini lonke bantu bezimbabwe, siyalikhutha ukuthi lizinze njalo lingahambahambi nje mahlayana. Kodwa sikhuthaza bonke abasebenzayo lalabo abalamabhizimusi emadolobheni ukuthi beqhubeke ngamabhizimusi abo njengenhlalayenza. Esikufisayo yikuthi libe lamalungelo kanye lenkululeko njalo sibuyisele ilizwe esimeni esivumela abakwamanye amazwe ukuthi bazevula amabhizimusi ezimbabwe njalo kube lentuthuko lempumelelo esayilwelayo yafelwa ngabantu abanengi.”

Uphinde wathi amalunga amabandla aphikisa uhulumende kumele aqaphele ngabakwenzayo.

“Kwabamabandla ezombusazwe, siyalikhuthaza ukuthi lixwayise amalunga enu ukuthi engaze enza udlakela. Kwabasakhulayo, siyalikhuthaza ukuthi likunanzelele ukuthi ilizwe leli ngelenu. Lingaze layengwa ngemali engcolileyo. Liziphathe. Kwabezinkonzo siyalicela likhulekele ilizwe lethu njalo litshumayele ivangeli lokuthula, ukubambana lentuthuko.

“Kini lonke bantu beZimbabwe labakwabmanye amazwe, sithanda ukukubeka sobala kini ukuthi asihluthunanga intambo zombuso. Esikwenzayo yikuzama ukulungisisa indubo ilizwe lezimbabwe elibhekane lazo. Abalwa impi yenkululeko siyalikhuthaza lani ukuthi lilondoloze ukuthula.”

Kulembiko ethi ibutho selibophe iziphathamandla zikahulumende ezigoqela uMnu. Ignatius Chombo labanye bakhe abakucele lebandla leZanu PF elibizwa ngokuthi yiGeneration 40 (G40).

Isikhulumeli sebandla elibusayo, uMnu. Simon Khaya Moyo, uthe uzwe kuthiwa kukhona okwenziwa libutho kodwa kafunanga ukukhuluma okunengi ngaloludaba.

Facebook Forum

XS
SM
MD
LG