Abadabuka eZimbabwe abasebenzisa amaphepha aweSpecial Zimbabweans Exemption Permit bakhuthazwa ukuba baqale ukulungisa amanye amaphepha kulandela umbiko kahulumende wakwele South Africa othi usezaluvala uhlelo lolu.
Uhulumende wabika ngeviki ephelileyo ukuba abalamaphepha la kumele badinge ezinye indlela zokuhlala lokusebenza kwele South Africa ngoba kasoze avuselele amaphepha la ekupheleni kuka Mpalakazi lonyaka.
Baphiwe umnyaka ukuba balungise amaphepha la. Abazehluleka ukuwalungisa bazasuswa ngenkani kwele South Africa.
UMnu. Ngqabutho Mabhena, umgcinisihlalo wenhlanganiso eyeZimbabwe Community in South Africa, uthi kunengi okumele kwenziwe ngabadabuka eZimbabwe abalamaphepha aweSpecial Permit.
Kulabantu abafika phose inkulungwane ezingamakhulu amabili – 178,000 abalamaphepha aweSpecial Zimbabweans Exemption Permit.
Kulabanye abadabuka eZimbabwe abafuna uhulumende anike bonke amaphepha okuhlala elziweni leli njengabadabuka kwele South Africa, abaphanyeka udaba lolu emthethwandaba uhulumende engakaphumi lesinqumo sokuvala uhlelo lolu.
UMabhena uthi inengi labaphethe amaphepha aweZEP bazehluleka ukuthola amanye amaphepha azakwenze besebenze njalo behlale kwele South Africa.
Abantu abanengi babalekela indlala lokukhuhlanyezwa nguhulumende eZimbabwe.