UMongameli Emmerson Mnangagwa uthi kumele abantu babambane eZimbabwe ukwenzela ukuthi kuguqulwe umnotho welizwe obungathuthuki ngEmfanelo eminyakeni eminengi edluleyo.
UMnangagwa wethule amazwi la namuhla eState House eHarare kunanzwa usuku lukazibuse phansi kwesihloko esithi ‘Zimbabwe at 41: Together, Growing our Economy for a Prosperous, Resilient and Inclusive Society’.
Uthe kumele abantu bakhangele obekusenzakala elizweni lokwenzakala okwamanje ukwenzela ukuguqula umnotho lokunye. Uncome lokuvuselelwa kohlelo lwabatsha olweNational Youth Service, olwesatshwa ngabaphikisayo abathi lusetshenziswa sonke isikhathi kusenziwa ukhetho eZimbabwe.
UMnangagwa uphinde wathi uhulumende wakhe ufisa ukuhlonipha ngemfanelo bonke abantu abalwa impi yenkululeko lababeyisekela. Uthe lokhu kugoqela ukulungisa isithombe sika Mbuya Nehanda, esizakhumbuza abantu ngokwenziwa nguye kuqala ukulwisana labamhlophe. Uphinde wathi abantu akumelanga besabe amajekiseni okuvuselela amasotsha omzimba awokulwisana legciwane leCOVID-19.
Uthe amajekiseni asetshensizwa eZimbabwe ahlolwa luhlangothi olukhangelane lemithi olweMedicines Control Authority of Zimbabwe. Ngomhlabathi owaphiwa abansundu, uMnangagwa uthe uhlelo lolu kalusoze lubiselwe emuva ngoba luthakazelelwa nguzulu.
Bakhona abancome amazwi kaMnangagwa labanye njalo abathi luqakathekile uhlelo lwabatsha olweNational Youth Service. Omunye wabo nguNkosazana Yolanda Tshuma.
UMnu. Felix Mafa, umsekeli wesikhulumeli sebandla leMDC Alliance, uthi ibandla elibusayo selilungiselela ukhetho luka 2023 ngokuthi abantu abatsha laba kube yibo abazethusela uzulu ukuba akhethe njalo ibandla elibusayo.
UMnu. Mqondisi Moyo, umkhokheli webandla leMtwakazi Republic Party, usola isinqumo lesi esithi abatsha bazafundiswa ukuba yizikliwi.
Kusenjalo, uMnu. Nelson Chamisa wethule umbiko namuhla esithi kunzima okwenzakala eZimbabwe. Isikhulumeli sakhe, uDokotela Nkululeko Sibanda, uthi uChamisa uhlutshwa ngokubhekane lozulu.
UMnangagwa uphinde wabika ukuthi umnotho welizwe uthuthuka ngemfanelo loba kulomkhuhlane weCOVID-19.
