amalinks wokungena

Breaking News

Kulendlala Eyesabekayo eMatabeleland South


Inkomo ezidla isikuba lokunye okutshiyeneyo ...

Izakhamizi zeZansi yeMaNdebeleni zithi zibhekane lendlala embi njalo umumbu eseziwuthola ovela kuhulumende uphehliwe lezifuyo lazo ziqhubekela phambili zisifa ngenxa yendlala.

Izakhamizi esixoxe lazo zithi umangoye selala eziko emakhaya ngoba zingenelisi ukuthenga ukudla ezitolo ngenxa yentengo ephezulu kuthi umumbu eziwuthola phansi kohlelo lukahulumende uphehliwe.

UNkosazana Attalia Ndlovu, isakhamuzi seNtepe, uthe basala lomumbu omlutshwane ngemva kokulahla ophehliweyo ongeneliyo inyanga eyodwa.

Inkomo sezilamba okumangalisayo ...
Inkomo sezilamba okumangalisayo ...

“Indlala inkulu kakhulu lonyaka akulanto. Abantu konke lezifuyo kuyafanana kunzima sibili loba laye uhulumende ezama ukuletha okungamasaka lokhu komumbu kubuya kugcwele idoti okokuthi uyakhupha amagokoko amabili kuphela okunye kuyabe sekunuka manje hanti sizangenwa ngumkhuhlane kunzima sibili indlala yalonyaka hayi.”

Amazwi akhe agcizelelwe nguNkosikazi Maggi Moyo, isakhamuzi seMawane oleminyaka yokuzalwa engamatshumi ayisikhombisa lantathu, othe phezu kokuba umumbu uphehliwe bathwala nzima ukubhadala indleko zokuthwala lowomumbu.

“Iyamangalisa indlala imbi kakhulu ngoba vele asilalutho, kusukela sihola amabele amanye siwahola ebolile siwakhiphe sipepe uyezuza igokoko ngoba nxa ungelamali yonaleyo i$8 isaka lakho liyathathwa liphiwe omunye manje mina ngingugogo nginje ngiyayithatha nga kakulancedo ngitsho sasisizwa kuthiwa kuyaholwa singazi ukuthi kuyathengwa ngoba lokhu kuyafana lokuthenga.”

UMaMoyo ugcizelele wathi ngaphandle kodubo lokudla babhekane njalo lodubo lokusilela kwamanzi esigabeni sabo.

“Lapha siphila nzima akulanto enhle. Ukuthi singathi siphila kuhle emaphandleni hayi ngoba ledamu amanzi esiwanathayo yilawana alerusi siwagebha phakathi edamu bayenza imithombo yokunathisa inkomo banathise lembuzi sibe lathi sesikhelela nxa sifika lapha ekhaya serusile vele akulabuhle lapha eMawane ngoba noma sikhangele uzezwa omunye kuthiwa ufile ngendlala.”

Izifuyo kanye lenyamazane zendle lazo zibhekane lendlala kulesisabelo ngenxa yokutshabalala kwamadlelo lokusilela kwamanzi njalo sezedlula inkulungwane ezilitshumi inkomo esezibulewe yindlala, eZansi yeMaNdebeleni.

Inkomo ezinikwa utshani lesikuba ...
Inkomo ezinikwa utshani lesikuba ...

UMnu. Shepard Ncube oweNtepe uthe isimo sendlala sibi lonyaka njalo sethenga isikuba ukuze ahlenge inkomo zakhe.

“IDrought yalonyaka inzima kakhulu ngiyazama ukuncedisa inkomo ngokuzinika istockfeed lokuzinika utshani ngihlanganisa utshani lestockfeed lamahlanga ukwenzela ukuthi zithole amandla lesawudo ngoba ngithengile isawudo ngifake esibayeni ukuthi zilale zikhotha , isimo sendlala sikhulu kakhulu lonyaka esayidini yezifuyo ngobunengi vele zifile zibulawa yindlala ezinye zikhitshwa amathole lamanzi ayahlupha futhi ngoba sesinathisa esikotsho sezikotshozelwa.”

Esinye isakhamuzi seNtepe uMnu. Collin Sibanda uthi kuyadingeka ukuthi izakhamizi zithole imfundiso yokulondoloza imvelo ikakhulu ngalesisikhathi sokuguquka komkhathi eseClimate Change ukuze kwenqatshelwe indlala.

“Khathesi kunje izulu lingani eyinye imbangela yikuthi ideforestation eyenzakalayo inkulu kakhulu, ukungcola okwenzakalayo phandle esingathi yipollution kukhulu kakhulu silamaplastic ongawabona lapha utshaywe luvalo ukuthi njengoba egqibeleka phansi amapastures amadlelo ezifuyo zethu ayaphela ngoba lapho okugqibeleka khona amaplastic yonke lawa akusoze kubekhona okuzamila futhi.”

UKhansila kaWard 13, uMnu. Miclas Ndlovu, uthe ngenxa yokuthi uhulumende kalamali yokusungula inhlelo zokuphathisa uzulu wemaphandleni inengi lezakhamizi selisungule inhlelo zokuzigebhela imigodi yamanzi.

“Amanzi hayi kabonakali, khathesi nje sengilolunye uhlelo njengokhansila engilwenzayo ngikhulumisana lezakhamizi ukuthi zizibonele imigodi so far ngithe ngilaphana eMawane 1 ngeviki ephelileyo ngathola abeCorner line bathe balembuzi imizi engu34 mbuzi, mbuzi bathi bafuna ukuzithengisa bagebhe imigodi yabo abalaphana eHangwa bathi bona bayacontributer R1,000 each imizi engu27 bakhangelele ukugebha imigodi njalo.”

Esethula uluhlu lokubuthaniswa lokusetshenziswa kwemali kahulumende, iBudget ka2020 ngoLwesine, umphathintambo wezemali, uMnu. Mthuli Ncube wazise ukuthi uzakhupha izigidi ezedlula ikhulu zamadola - $128 million ezasetshenziswa ukwakha idamu leCauseway elikhangelele ukuthi liqede udubo lwamanzi emaphandleni eGwanda.

Uphinde wathi uzasebenzisa ibillion elilodwa lamadola ukudingela uzulu ukudla elizweni lonke jikelele ngoba inengi libhekane lendlala.

Izulu liqalile ukuna kuliviki endaweni ezitshiyeneyo osekulethe ithemba kuzakhamizi.

Bakhala Ngendlala Emaphandleni
please wait

No media source currently available

0:00 0:04:36 0:00


Facebook Forum

XS
SM
MD
LG