Inhlanganiso yezifundi eye Zimbabwe National Students’ Union ithi siyamangalisa isinqumo esithethwe yiziphathamandla zedale lephalamende eziyale ukuthi idale leli lihlolisise isicoco sedoctorate esisanda kutholwa nguNkosikazi Grace Mugabe ekolitshini leUniversity of Zimbabwe.
Inhlanganiso le ibhalele idale lephalamende kunsuku ezisanda kwedlula icela ukuthi sihlolisise isicoco lesi esichothozwa yizifundi zekolitshi leli zisithi akutshengisi ukuthi uNkosikazi Mugabe wabhaliswa ukuthi ayenze izifundo zeDoctor of Philosophy.
Umqondisi weZINASU, uMnu. Gilbert Mutubuki, uthi idale lephalamende lithe kalilamandla okuhlolisisa isicoco lesi asithola ngelanga umsekeli kamongameli welizwe uNkosikazi Joice Mujuru ethola esakhe esikhangelane ngezentuthuko.
UMutubuki uthi kuyamangalisa ukuthi idale leli lesabani ngokuhlolisisa ukuphiwa kwesicoco lesi esamangalisa uzulu. UGibbs Dube weStudio 7 uzame ukukhuluma losomlomo wedale leli, uMnu. Jacob Mudenda,ongafunanga ukukhuluma ngodaba lolu.
Ukuze sihlaziye udaba lolu, sixoxe loMnu. Nkululeko Sibanda ingcwethi kwezombusazwe osekolitshini leHuddersfield University eBhilithane othi akulunganga okwenziwe lidale lephalamende.