amalinks wokungena

Breaking News

Ayabuyela eTrade Fair Amankampani Adabuka Kwele Botswana


Iziphathamandla zenkampani yeZimbabwe International Trade Fair zikhuluma lentathelizindaba nyakenye.

Amankampani alitshumi lanthathu adabuka elizweni leBotswana azabukisa embukisweni weZimbabwe International Trade Fair (ZITF) oqala ngoLwesithathu koBulawayo.

Amakampani la athi abona ilizwe leZimbabwe njengomkambo omuhle wokubukisa impahla kanye lemisebenzi yawo, ukuze athole ibhizimusi.

Kungakho-ke akubona kufanele ukuthi abukise njalo embukisweni oweZimbabwe International Trade Fair.

Amankampani, ikakhulu akuhlangothi lwamafekitali alungisa impahla akhokhelwa yinhlanganiso ebona ngokukhanga ibhizimusi kweleBotswana, eyeBotswana Investment and Trade Centre (BITC), yiwo asembukisweni oweZITF, walonyaka.

IBITC ithi umbukiso oweZITF usezingeni eliphezulu uyindawo lapho amalunga ayo angenelisa ukukhanga amehlo awamabhizimusi.

Umphathintambo obona ngobudlelwano beBotswana lamanye amazwe, uMnu. Vincent Seretse, uthi iZimbabwe ngumakhelwane oqakathekileyo kakhulu kwezokuthenga lokuthengiselana, ikakhulu amazwe womabili ekhangele ukwehlisa ukuthembela kakhulu kweleSouth Africa ekuthengeni imphahla.

"EleZimbabwe liqhakathekile kakhulu ekuthengeni lekuthengiselaneni, ngoba sithola eyinye indlela engayisiyo kuthenga elizweni leSouth Africa kuphela"

UMnu. Stan Ncube, isizalwane seZimbabwe esihlala eGaborone, uthi kuqakathekile ukuthi amazwe womabili aqinise ubudlwelwano kwezokuthenga lokuthengiselana, ikakhulu uma efuna ukusuka ekuthembeleni kweleSouth Africa.

"Kuthabisa ukwazi ukuthi amakampani aweBotswana ayabukisa eTrade Fair. Kuqakathekile ukuthi amakampani amazwe womabili asebenzisane babone okungekho emazweni womabili, ukuze behlise ukuthembela eSouth Africa, kodwa besebenzisane bona bodwa."

Omunye okubhizimusi yokuthenga ethengisa imithi yezifuyo phakathi kwamazwe womabili, uMnu. Rodwell Moyo, uthi uyakuthakazelela ukubukisa kwamakampani eBotswana eTrade Fair, ngoba kulithuba lokuqhelisa ubudlelwano kubhizimusi.

"Leli lithuba elihle lokuhlanganela lamakampani aweBotswana, ukuthi sikhulumisane ngezebhizimusi ukuthi sibone ukuthi singasebenzelana njani."

Nyakenye eleBotswana lithumele amakampani alitshumi lanye ukuyabukisa eZITF, njalo wonke aveze ukusuthiseka, noma nje bekulokukhathazeka ukuthi umbukiso lo awusela sisindo njengakudala. Kodwa lonyaka umumo uguquke kancane, kulethemba lokuthi, ngemva kokungena kukahulumende omutsha kaMongameli Emmerson Mnangagwa yena okhiphe umbuso kowayengumongameli Robert Mugabe isithunzi seZITF laso silakho ukuphenduka.

Facebook Forum

XS
SM
MD
LG