amalinks wokungena

Breaking News

Asekuzinga Eliphezulu Amalungiselelo Omncintiswano oweZITF Tug of War


Asekuzinga laphezulu amalungiselelo awomncintiswano walonyaka owomdlalo we Ingwebu Zimbabwe National Tug of War Championships oqhutshwa minyaka yonke ngesikhathi kulombukiso we Zimbabwe International Trade Fair edolobheni lako Bulawayo.

Kulamaqembu angamatshumi amathathu lanhlanu azaphatheka kumncintiswano walonyaka owe Zimbabwe National Tug of War Championships njalo amaqembu angamatshumi amabili lesithupha ngawabesilisa kuthi ayithoba munwe munye ngawabesifazane.

Lawa maqembu azadibana ekuseni emagcekeni esikolo se Gifford High ekuseni ngoMgqibelo kuthi emini eyosuku olufanayo lawo maqembu ayabe ephumelele azakuyangqikilana phakathi enkundleni ye Zimbabwe International Trade Fair kusukela kusigaba se quarter – final umncintiswano uze ufike komlindi uyacina.

Isiphathamandla senhlanganiso ye ZITF esibona ngokudlelana lozulu uNkosikazi Stella Nkomo uthi lumncintiswano ngomunye wenhlelo ezikhangelelwe ngabanengi embukisweni we Zimbabwe International Trade Fair.

“Minyaka yonke sihlala singabakhangelele ukuqhutshwa kwalumncintiswano we Ingwebu National Championships ngokuzitshayela ihlombe okukhulu.

Ngithanda ukubonga abasekele ngemali kanye labadlali ngoba kungasibo aluba asikhulumi ngawo lumdlalo.”

Nyakenye kunqobe iqembu le Zesa Bulawayo kucele labesilisa lakucele labesifazane njalo nyakenye umvuzo wokuphakamisa isicoco ubuthe xaxa kulalonyaka njengoba nyakenye inkezo ibisiza lenkulungane elamakhulu amahlanu kucele labesilisa kuthi iqembu elinqobe kucele labesifazane lithole amakhulu ayithobaminwe mbili ikanti lonyaka limali yehle yaya kumakhulu amahlanu kuphela nxazombili.

Kusenjalo kuzaqhutshwa njalo umncintiswano wokugijima owe Four Minute Mile ngoMgqibelo ekuseni khona njalo enkundleni ye ZITF Main Arena.

Lumncintiswano ungenwa ngabadlali okuyabe kumele begijime amahlandla amane ngaphansi kwemizuzu emine njalo usekelwa ngemali ngabe Coca Cola.

Facebook Forum

XS
SM
MD
LG