amalinks wokungena

Breaking News

'Kumele eZimbabwe Kwenziwe Ukhetho Olubalulekileyo'


UMnu. Koffi Annan uphahlwe ngabanye bakhe uNkosikazi Mary Robinson loMnu. Mnu. Lakhdar Brahim.

Iqula labadala abaziwa ngokuthi The Elders, elake layaliswa ukungena kwele Zimbabwe ngowayengumongameli uMnu. Robert Mugabe, lithi kumele amabandla aphikisayo akhankasele ukhetho oluzayo ngokuthula njalo engahlukumezi ikhomishini yeZimbabwe Electoral Commission ngokuyitshila umoya.

Umgcinisihlalo waleliqula, UMnu. Koffi Annan, utshele intathelizindaba eHarare ngoMgqibelo ukuthi kumele inkokheli ilandisele uzulu ngezakumenzela khona hatshi ukujikijelana ngamazwi athukayo.

Omunye okuqula leli, uNkosikazi Mary Robinson, uthi ukhathazekile ngendlela inkokheli yeZimbabwe Electoral Commission ehlambazwa ngayo nguzulu ebulenjini bokuzilibazisa obunjenge Facebook lokunye okutshiyeneyo.

Iqula leli lithe lanelise ukubonana lenkokheli yamabandla ezombusazwe encintisa kukhetho lukamongameli, inhlanganiso ezilwela ilungelo loluntu kanye le khomishini ebona ngezokuqhutshwa kokhetho elizweni iZEC.

Kodwa lithi kalenelisanga ukubonana lowayengumongameli, uMnu. Robert Mugabe, owake wabavimba ukuthi bengazehlolisisa ukuqhutshwa kokhetho eZimbabwe.

Baqonqosele uzulu ukuthi aziphathe njalo ayevota ngobunengi lokuthula.

UMnu. Annan wayengunobhala jikelele wenhlanganiso yamazwe womhlaba eye United Nations kuthi-ke uRobinson wayeyinhloko kahulumende kwele Ireland.

Omunye wabo owenelise ukuya kwele Zimbabwe nguMnu. Lakhdar Brahim, owaye ngumphathintambo obona ngezokudlelana lamanye amazwe kwele Algeria.

Kusenjalo, abenhlanganiso yamazwe akumanyano wezwekazi leAfrica oweSouthern African Development Community lamuhla baphawule ngokusemthethweni iqula labazabona ngezokuqhutshwa kokhetho eZimbabwe iSADC Electoral Observation Mission to the 2018 Harmonised Elections Zimbabwe.

Labo bakhuthaza inkokheli yamabandla kanye labalandeli babo ukuba bebovuma ukwehlukana ngemibono kungekho kuhlukumezana.

Bakhuthaza njalo abe ZEC ukuba baqhube umsebenzi wabo ngendlela engasolisiyo, inkokheli yamabandla layo ibe ngumzekeliso ngekuqhuba ukhetho oluhloniphekayo.

Umkhokheli waleliqula, UMnu. Tete Antonio, ongunobhala omkhulu kugatsha lwezokusebenzisana labakwamanye amazwe elizweni le Angola, utshele uthe kuqakathekile ukuthi kuqhutshwe ukhetho ngokulandela imithetho yelizwe leZimbabwe.

Kodwa inkokheli yamabandla ezombusazwe ebikulomkhosi ebalisa uMnu. Alphios Mapuranga, unobhala webandla leUnited African National Council, isole kakhulu okwethulwe ngabamele iSADC kukhetho lolu.

Lokhu kusekelwe nguMnu. Thabani Tigere, umkhokheli webandla leEconomic National Democratic Party.

Kodwa abe SADC laba bathi bona basebenza ngokulandela imithetho yelizwe lapho abahlolisisa khona ukhetho.

Iqula lakuqala elizothatha isikhathi eside leza kuleli mhlaka 7 Ntulikazi kuthi-ke elizohlala insuku ezimfitshane lona lize kuleli mhlaka 18 kuyonale inyanga.

Amalunga akuqula leli avela kwele Democratic Republic of Congo, Lesotho,Namibia, Malawi, Mauritious, Mozambique, South Africa, Tanzania le Zambia.

Leliqula lithembise ukuzakwethula umbiko walo wangemva kokhetho mhlaka 1 Ncwabakazi.

Udaba Esilethulelwe NguMavis Gama
please wait

No media source currently available

0:00 0:05:23 0:00

Facebook Forum

XS
SM
MD
LG