Izakhamizi zeMbimba kuWard10 esigabeni seBulilima West esabelweni seMatabeleland South ziqhubekela phambili ngokwakha ikilinika ezanceda abantu abahamba umango omude besiyakwelatshwa.
Okwamanje zelatshwa eMadlambudzi, eNdolwane leHingwe.
Usobhuku wesigaba lesi, uMnu. Daniel Dube, uthi kuqakathekile ukuba lekilinika eMbimba.
Isakhamuzi seMbimba, uNkosikazi Janet Mpofu, uthi abesifazana bathwele nzima ngenxa yokuswelakala kwekilinika.
Lokhu kusekelwa nguNkosikazi Mpofu othi kulabanye abesifazana abacina bebelethela egangeni bazama ukuya emakilinika atshiyeneyo.
Uthi abazali labo bayehluleka ukuhlabisa abantwana amajekiseni okuba bengathaphi imikhuhlane egulwa ngontanga.
UNkosazana Senzeni Ndebele, okunhlanganiso yeHabakkuk Trust esigabeni lesi, uthi abantu sebahlupheke kakhulu ngokuswelakala kwekilinika.
Zinengi indawo eMatabeleland South okwakhiwa amakilinika kunhlelo ezisekelwa ngabantu abadabuka eZimbabwe abahlala kwamanye amazwe.
Udaba lolu silethulelwe yinhlanganiso yeHabakkuk Trust ibambisana lomsakazo weStudio 7.