amalinks wokungena

Breaking News

Bamiswa Emthethwandaba Belamaqubaquba Empahla Eyatshontshwa Ezitolo


Kuthiwa impahla le yatshontshwa evinkilini leChoppies.

Izibotshwa eziyisifica munwe munye ezetheswa amacala okutshontsha impahla ngesikhathi uzulu etshengisela ezibiza amadola ayinkulungwane ezintathu ngoLwesibili zimiswe phambi komthethwandaba kamantshi oweTredgold Magistrate Court lapho ezisuke zayabonisa inkundla lapho ababefihle khona impahla.

Izibotshwa ezigoqela uMethuseli Tshuma, Desmond Pendamazuva, Marshal Ncube, Nokuthula Mlambo labanye bahlala elokitshini leNew Luveve koBulawayo.

Impahla evezwe emthethwandaba ...
Impahla evezwe emthethwandaba ...

Lababantu betheswa amacala okweba evinkilini leChoppies ezibalisa ifridge, igas cylinder, umtshina wokusika inyama lezinye impahla mhlaka 16 Zibandlela ngesikhathi uzulu etshengisela emigwaqweni ekhonona ngokugugudeka komnotho welizwe leZimbabwe.

Izibotshwa lezi zimelwe ngamagqwetha aweZimbabwe Lawyers for Human Rights abagoqela uMnu. Lison Ncube. UNcube uthe bahambe endaweni lapho okwakufihlwe khona impahla ecatshangelwa ukuthi yatshontshwa.

Umtshutshisi uWhisper Mabhaudi, uMantshi uNduna, izibotshwa, amagqwetha, labafakazi baye elokitshini leNew Luveve lapho abafike batshengiswa lipholisa elalicubungula lelicala eselingumfakazi esilugwini senkukhu lapho izibotshwa ezagebha phakathi kwesilugu zafihla impahla.

Abanye abamiswe emthethwandaba besetheswa amacala okweba impahla ezitolo.
Abanye abamiswe emthethwandaba besetheswa amacala okweba impahla ezitolo.

Kusenjalo, abenkundla bahambe njalo emzini wesinye sezibotshwa, uNokuthula Mlambo, otshengise inkundla lapho agebhele khona igas cylinder lomtshina wokusika inyama kanye lokuthi ifridge yayifihlwe endlini.

Ezinye zempahla ezathunjwa koChoppies zibikwa zazifihlwe eZulu Khayalami Funeral Palour eLuveve kubhizimusi likamnewabo wesinye sezibotshwa uSisasenkosi Zulu.

Kodwa ekubuzweni yintathelizindaba umnikazi webhizimusi leli, uMnu. Mbuso Zulu, uthe ubengazi ukuba lokhu yikho okwenziwa ngudadewabo labangane bakhe.

Udaba lolu lukhangelelwe ukuqhubekela phambili NgoLwesine.

Udaba Esilethulelwe NguAnnastacia Ndlovu
please wait

No media source currently available

0:00 0:04:17 0:00

Facebook Forum

XS
SM
MD
LG