amalinks wokungena

Breaking News

'Kasisoze Sesule Izijeziso Zenotho Ezafakelwa uMugabe Labanye Bakhe'


UNkosikazi Stephanie Sullivan okuhlangothi lukahulumende weMelika olubona ngokudlelana lamanye amazwe olwe Department of State ukhuluma emhlanganweni ohlolisisa okwenzakala kwele Zimbabwe.

Idale leCongress labaphathintambo belizwe leMelika, amabandla abusayo labameli benhlanganiso ezizimelezodwa bathi uhulumende kaMongameli Emmerson Mnangagwa ulethuba lokuvezela uzulu lamazwe emhlabeni wonke jikelele angakwenza lobanje kungamelanga kwesule izijeziso zenotho ezafakelwa owayengumongameli uMnu. Robert Mugabe labanye bakhe.

Lokhu kuphume emhlanganweni owenziwe luhlangothi lwedale leCongress yeMelika olwe Subcommittee on Africa and Global Health Policy owenzelwe eWashington DC ngoLwesibili.

Umhlangano lo ubuphethwe nguMnu. Jeff Flake, omele iArizona kudale leCongress ekubandla lama Republicans, uMnu. Chris Coons okubandla lema Democrats lomunye wakhe uMnu. Cory Booker kanye loMnu. Tom Udall abakukhomithi yeUnited States Senate Foreign Relations Committee.

UNkosikazi Stephanie Sullivan, okuhlangothi lukahulumende weMelika olwe Department of State obengumqali wesiziba, ukubeke sobala ukuthi uhulumende kaMongameli Mnangagwa, owasusa uMnu. Robert Mugabe esikhundleni, ulethuba lokuveza ukuthi uzasebenzela kahle abantu beZimbabwe.

“Okwenzakala eZimbabwe kuveza ukuthi kwenza abantu babambana okumangalisayo ngesikhathi kusenzakala becabanga ukuthi kuzaba lempilo enhle elandelayo. Ukuguquka kukahulumende kunikeza uhulumende omutsha ithuba lokuguqula okunengi obekusenzakala eZimbabwe. Okwenzakalayo kulakho ukuthi ilizwe leMelika likukhangele ngeyinye idlela kulalokho obekusenzakala. Sifuna ukubona inguquko kwezombusazwe lezemnotho ngendlela okungakaze kwenzakale ngayo kwele Zimbabwe.”

Uthe akutsho ukuthi sokumele okwamanje kwesulwe izijeziso zenotho ezafakelwa uhulumende kaMugabe labanye bakhe.

“Akumelanga sithi lo nguhulumende omutsha ngakho-ke azisafunakali izijeziso zenotho. Hatshi akunjalo. Sizabe zihlolisisa okwenzakala eZimbabwe sibona ukuthi kuyini okuguqulwa nguhulumende omutsha. Okunye esizakukhangela lukhetho oluzayo. Kunengi okuzakwenzakala. Sifuna ukubona ukukhululeka kokhetho njalo simelele ukuthi sicelwe ukuthi siyebukela ngesikhathi kusenziwa ukhetho kwele Zimbabwe lapho esizahambisa umuntu oqakathekileyo onsundu.”

UMnu. Cory Booker loMnu. Jake Flake bedale leSenate.
UMnu. Cory Booker loMnu. Jake Flake bedale leSenate.

UMnu. Coons uthe kaboni ukuthi lesi yisikhathi sokuthi kwesulwe izijeziso zenotho lokunye okufanayo.

“Njengabantu bonke ngingomunye wabantu abathakazelela ukubona uMnu. Robert Mugabe esuka esikhundleni. Kodwa-ke akumelanga sibukele kuphuma untandokayiphikiswa kungena njalo omunye. Ngokubona kwami angiboni ukuthi kumele sithathe inyathelo elitsha elingafani lalokho esasikwenza kusabusa uMugabe okunjengo kwesula izijeziso zenotho ezafakelwa uMugabe labanye bakhe. Akumelanga njalo sisuse okunqabele ukuthi ilizwe leZimbabwe lingatholi imali kuhlanganiso ezitshiyeneyo.”

UMnu. Flake uthe uMnangagwa ukhanya uyaziwa ngakwenza ngesikhathi seGukurahundi ngakho-ke akwaziwa ukuthi uzakwethulelani ilizwe leZimbabwe.

“Siyamazi uMongameli Emmerson Mnangagwa njengoba ubeseduzane loMnu. Robert Mugabe okwesikhathi eside. Wetheswa umlandu wokuthi wancedisa ekubulaleni abantu abafika inkulungwane ezingamatshumi amabili – 20,000 ezabelweni zeMatabeleland kanye leNkabazwe.”

Izizalwane zeZimbabwe ezikhulume emhlanganweni lo ezigoqela uMnu. Tendai Biti okumanyano weMDC-T Alliance, uMnu. Dewa Mavhinga olwela ilungelo likazulu loMnu. Peter Godwin oyintathelizindaba osehlala zivumelane labo zisithi uMnangagwa kumele axolise lokwenziwa libutho leGukurahundi.

UMavhinga uthe lokhu kumele kubemqoba njengakho konke okwenziwa nguhulumende kaMnangagwa okhangelelwe ukuthi aqhube ukhetho olubalulekileyo ngomnyaka ozayo.

Abakade besemhlanganweni oqoqwe yikhomithi ezibizwa ngokuthi yiSubcommittee on Africa and Global Health Policy owenzelwe eWashington DC obuhlolisisa okwenzakala eZimbabwe.
Abakade besemhlanganweni oqoqwe yikhomithi ezibizwa ngokuthi yiSubcommittee on Africa and Global Health Policy owenzelwe eWashington DC obuhlolisisa okwenzakala eZimbabwe.

Lokhu kusekelwe nguMnu. Booker othe banengi akakhulu abantu abakuhulumende kaMnangagwa abalamacala okuhambelana lodaba lweGukurahundi kanye lokweba.

UMnu. Muzi Ncube, unobhala webandla leMDC-T kwele Melika, uthe loludaba kumele lulungiswe ngokutshetsha.

Uphinde wathi uyananzelela ukuthi abantu abaphikisa ibandla elibusayo batshaya kuzwele lobanje uhulumende ezama ukwenza okuhle.

UMnu. Guni webandla leZanu PF uthe ibandla lakhe seliqalisile ukulungisa okunengi okubhekane lelizwe leZimbabwe.

“Akumelanga sikhohlwe ngokwenziwa libutho leGukurahundi. IGukurahundi yaba liphutha elikhulu okumangalisayo. Ngakho uhulumende okumele akwenze yikuxolisa kanye lokungcwaba bonke abantu ababulawa bafakwa endaweni ezingalunganga. Siyakwazi lapho okulamagcwaba abantu ababulawayo. Abantu abalezihlobo ezafayo kumele bavunyelwe ukuthi bangcwabe izihlobo zabo ngemfanelo.”

Izizalwane zeZimbabwe ezingene umhlangano lo zithe ziyafisa kakhulu ukuthi ukhetho oluzayo luzakwenziwa ngemfanelo. UBiti ugcizelele esithi abantu abahlala kwamanye amazwe kumele bavote kukhetho oluzayo njengalokho okuhlelwe yisisekelo sombuso welizwe.

Udaba Esilethulelwe NguGibbs Dube
please wait

No media source currently available

0:00 0:05:19 0:00

Facebook Forum

XS
SM
MD
LG