Umthethwandaba ophatha indaba zesisekelo sombuso welizwe, oweConstitutional Court wethule isinqumo esithi akukho emthethweni ukuthoniswa kwezisebenzi zeElection Resource Centre ezazifundisa uzulu indlela zokuvota kungakenziwa ukhetho olukhulu nyakenye.
Idale leli lithi izisebenzi lezi ezigoqela umqondisi wenhlanganiso uMnu. Tawanda Chimhini, uMnu. Moses Chikora, uMnu. Wadzanai Nyakudya loMnu. Farai Saungweme kabephulanga iziqondiso zomthetho weElectoral Act.
Lithi abane laba bebefundisa uzulu ukuvota ngendlela evunyelwa yisisekelo sombuso welizwe.
Abantu laba babotshwa ngoNtulikazi sokusele amalanga ambalwa ukuthi kwenziwe ukhetho lokudinga umongameli welizwe lamalunga ephalamende.
Bahambisa udaba lolu edale lomthethwandaba besithi amapholisa ephula amalungelo abo ngokubabopha befundisa uzulu indlela elungileyo yokuvota.
Igqwetha elilwela ilungelo loluntu, uMnu. Job Sibanda, utshele uGibbs Dube weStudio 7 ukuthi siyajabulisa isinqumo esethulwe lidale leConstitutional Court.