Abafundela ububalisi ekolitshini leJoshua Mqabuko Nkomo Polytechnic eGwanda, lamhlanje batshengisele bangene ezitaladeni betshaya itoyi toyi befuna ikolitshi libaphe impahla zamawunifomu abo abawabhadalela nyakenye kodwa kuze kube lalamhlanje abakawaphiwa.
Abafundi laba bangene kulikolitshi ngoMpandula nyakenye njalo bathi ikolitshi yababhadalisa amadola eMelika angamatshumi ayisithupha US$60 ukuze bathole amawunifomu abalisa itracksuit, isikhipha kanye lekepesi kodwa kuze kube lalamhlanje ikolitshi iyabhodabhoda ngodaba lwezigqoko zabo kungakho sebefuna imali yabo phambili.
Lapho umsakazo weStudio 7 ufika ekolitshini leli abafundi bebetshaya itoyi toyi phambili kwamahofisi womqondisi wekolitshi uDr. Ngoni Moyo besithi bafuna ukubhadalwa imali yabo.
Sixoxe lomunye wabafundi uMkhululi Ndlovu obike ukuthi sesiside isikhathi belinde impahla zabo njalo bebethenjiswe ukuthi bazaziphiwa ngoMvulo kuliviki kodwa kabaziphiwanga njalo.
UMqondisi weJoshua Mqabuko Nkomo Polytechnic ukhulume labafundi bakhe wavuma umlandu esithi ikolitshi alisoze libisele limali kubafundi.
UDr. Ngoni uthe, “Umlandu wethu kubo Intake 49 siyawuvuma ngoba phakathi kuka Mpandula loMfumfu lalisabhalisa, okwesibili sithi nxa lingasasibekezeleli sizathatha ama $60 siwafake kumali yefees.”
Abafundi kabavumelananga lalokhu okutshiwo nguDr. Ngoni njalo baqhubekele phambili betshengisela ngemva kokuba bachitheke befunga ukuthi abayikuqhubeka ngezimfundo ngaphandle kokuba baphiwe imali yabo ilidola leMelika.
Inengi labafundi kulikolitshi lifunda nzima ngenxa yokuswelakala kwezindlu zokuhlala kulelikolitshi.
Inengi labo lihlala emalokitshini lapho elibhadaliswa imali eziphezulu ngabanikazi bezindlu.