amalinks wokungena

Breaking News

Abantu Bakhuthazwa Ukuba Balandele Imisebenzi Emihle Kamuyi uJoshua Mqabuko Nkomo


Zimbabwe's Future Nkomo

Abantu abanengi bathi kumele uzulu alandela imisebenzi emihle eyenziwa ngumuyi uJoshua Nkomo, owalwa impi yenkululeko njalo waba ngumsekeli kamongameli engakatshoni.

UNkomo wabhubha mhlaka 1 kuNtilikazi ngomnyaka ka1999.

UNkomo wakhokhelela amabandla akuqala omzabalao wezombangazwe, ilizwe lilelwa inkululeko agoqela ele Southern African National Council (SANC), iNational Democratic Party (NDP) leZimbabwe African People’s Union (ZAPU).

Umkhokheli webandla leZAPU, uMnu Isaac Mabuka, uthi kumele uzulu weZimbabwe akhumbule uNkomo ngomsebenzi wakhe.

“Namuhla sikhumbula ubaba uNkomo, ongumuntu owatshengisa abntu be Zimbabwe ukuba bayancindezelwa. Watshengisa abantu ububi bamakhiwa, watshela abantu ububi besimo esasikhon.”

Lokhu kusekelwe ngumsekeli wesikhulumeli seMDC Alliance, uMnu Felix Mafa.

“Intaba yadilika mhlaka 1 Ntulikazi, sithi ilanga leli liqakathekile ngoba uNkomo wayengu baba we Zimbabwe. Njenge MDC Alliance silezifundo asitshela zona mayelana lomhlabathi ongasetshenziswa ngendlela.”

UMnu, Iphithule Maphosa uthe njebandla leZAPU bakhulumbula uNkomo njengomuntu owayangiswa libandla leZANU lona eselizenza lona elimthandayo.

“Amalanga lawa sikhumbula amaqhwe ethu akhulula iZimbabwe. UNKomo ngumuntu obe ethanda ukuthula lanxa engomkhokheli webuthgo eliqinileyo isnanzelele ukuthi ngumuntu okade engathandi udlakela.”

Okhokhela abatsha kuZANU PF koBulawayo, uMnu Munashe Mtutsa, uthi ibandla leZANU PF liyamqakathekisa uNkomo.

“Ilanga namhlanje liqakatheke kakhulu ngoba sikhumbula ubaba uNkomo, indaba leyi eyenkuliuleko ayingeke ikhulunywe kungela kukhulunywa ngobaba uNkomo.”

UNkomo wakhokhela ibandla leZAPU kukhetho luka 1980 wanqotshwa libandla leZANU elalikhokhelwa ngu Mnu Robert Mugabe.

Phakathi kuka 1982 kusiya ku 1987 kwaqhamuka ukufuthelana kwamabandla amabili eleZanu leleZapu, ibutho leFifth Brigade lathunywa ukuyabulala abasekeli bakhe, kumbuqhazwe owazakala ngegama lokuthi yiGukurahundi lapho okwabulawa khona inkulungwane ezedlula amatshumi amabili zabantu.

Ngomnyaka ka1987 emizameni yokumisa lokhu kubulawa kwabasekeli bakhe wakhetha ukukhulumisana leZANU okuzinkulumo ezacina ziphuma lesivumelwano sokubambana eseUnity Accord kwasekubunjwa iZANU PF wacina esenikwa isikhundla sokuba ngumsekeli kamongameli wesibili beloMnu. Simon Muzenda ebandleni elitsha.

Lanxa kwaba labanye ababekuZapu ababesithi waphambanisa ngokungena kusivumelwano seUnity Accord ngoba wenza ibandla leZapu ukuthi liginywe ngeleZanu, abanengi bazwisisa ayekutsho ngaleso sikhathi ukuthi wayezama ukuvimba ukutshabalaliswa kwesizwe sikaMthwakazi esasesihlaselwe kakubi empini yeGukurahundi.

Abanengi bathi ilanga likamhlaka 1 Ntulikazi kumele libe likhefu ukuze intsha icabangisise ngokuqhubekisa phambili imibono eyayikhuthazwa ngumuyi lokuzinikela kwakhe ukukhulula eleZimbabwe lakho konke okwenziwa nguNkomo esaphila okwakuyisibonelo esihle leqhawe lamaqhawe.

Facebook Forum

XS
SM
MD
LG