amalinks wokungena

Breaking News

Zanu PF: UJulius Malema Lilema Elidelela Abalwa Impi Yenkululeko


Abalandeli bebandla leZanu PF.

Abatsha abakubandla leZanu PF bathi uMnu. Julius Malema owebandla leEconomic Freedom Fighters uyalahlaka kakhulu nxa esithi uhulumende kaMongameli Emmerson Mnangagwa ubulala abantu eZimbabwe abamphikisayo.

UTendai Chirau, obambe okwesikhatshana isikhundla somsekeli kasibalukhulu wohlangothi lwabatsha oweYouth League, uthi uMalema ngumuntu ongabambi kahle kwezombangazwe njalo othikaza ukukhuluma iqiniso kulandela ukuxotshwa kwakhe kubandla leAfrican National Congress of South Africa.

UChirau uthi abethukanga ngitsho lakancane okwethulwe nguMalema “ofuna ukuthi abantu babone ukuthi lokhu ekhona kulandela ukuxotshwa kwakhe kubandla leANC.”

Uthi uMalema usekela izifiso zabahlamuka kubandla leZanu PF ababizwa ngokuthi yiGeneration 40 (G40) eyayifuna uMnu. Sydney Sekeramai athathe isikhundla sikamuyi uRobert Mugabe engakasuswa libutho esikhundleni sikamongameli.

UChirau uthi uMalema lilema nje elidelela abantu abalwa impi yenkululeko bekubandla leZanu PF lebandla leANC.

Okwethulwe nguChirau kusekelwe nguMnu. Patrick Chinamasa, obambe okwamanje isikhundla sesikhulumeli sebandla leZanu PF, loMnu. George Charamba, isikhulumeli sikamongameli.

Abaphikisayo bathi uMalema uyitshaye ekhaleni ngoba uMongameli Cyril Ramaphosa usethumele uNkosazana Baleka Mbete loDokotela Sydney Mafumadi ukuba bayehlolisisa okwenzakala eZimbabwe okubikwa ukuthi kulabantu abedlula amatshumi ayisithupha asebebotshelwe ukuzama ukutshotshozela abanye ukuthi batshengisele emigwaqweni besola ubokhohlakali lokunye okuhluphayo elizweni.

Abanye babotshwa ngamapholisa bahanjiswa kwabezomvikela kubutho ababatshaya kabuhlungu.

Facebook Forum

XS
SM
MD
LG