amalinks wokungena

Breaking News

Abantu Bachothoza Umabhalane Obona Ngokwethulwa Kwemibiko Ozama Ukuvikela uKembo Mohadi


FILE: UMnu. Nick Mangwana ukhuluma lentathelizindaba eHarare.

Abanye abantu abasenkundleni yokuxhumana eyeTwitter bachothoza okwethulwe nguMnu. Nick Mangwana enkundleni le othi omama abendileyo balakho ukuya emacansini labanye abantu.

UMangwana wethule lokhu ezama ukuvikela uMnu. Kembo Mohadi, umsekeli kamongameli, ovezwe yiZimLive ukuba uthandana labesifazana ababili abendileyo.

Ulobe wathi, “Umsindo omkhulu uvela emadodeni angazithembiyo. Nxa amadoda athetheyo eganga lamantombazana akulankinga. Nxa abesifazane abatshadileyo sebesiya emacansini lamadoda alezikhundla eziphezulu sebehlaba umkhosi! Owesifazana kasiyonto yomuntu. Uyenelisa ukwenza akufunayo loba uyathanda kumbe kawuthandi.”

Abalandela uMangwana enkundleni yeTwitter bathi kumele uMohadi atshiye umsebenzi ngoba utshaphaze iwofisi yakhe ngokuthandana labesifazana abatshadileyo.

Omunye wabamangaliswe ngokwethulwe nguMangwana nguMnu. Mkhaya Tindo othe kuyamangalisa akulobileyo. “Ukhulumani kanti? Uqinisile ngalokhu?”

UMangwana umphendule esithi, “Yebo. Ngitshonjalo”

Omunye njalo osebenzisa igama elithi Sosveguru uthe, “Kayimangalisi indlela ozama ukuvikela ngayo abakhulu bakho abenza izinto ezingelangqondo. Ufundisani abantwana bakho? Ukuthi ukwenza ubutshapha umuntu nxa etshadile zindaba zakho? Lokhu okhuluma ngakho kukhuthaza ubufebe.”

Kasenelisanga ukukhuluma ngodaba lolu loMangwana kanye loMohadi abangaphendulanga omakhalekhukhwini babo. Kasenelisanga njalo ukukhuluma loNkosikazi Abbigail Muleya Mumpambi kanye lomunye okuthiwa uthandana loModadi okuthiwa ngu Chevaughn.

UMohadi uvezwe yiZimLive eqhubekela phambili isethula ama-audios aveza ukuba uthandana labesifazana abanengi abatshadileyo. Kusihlwa ngeSonto, iZimLive ibisethule eyinye njalo ingxoxo phakathi kuka Mohadi leyinye intombazana okuthiwa wayeyihlawulela imali yezifundo.

KuAudio leyo uMohadi uzwakala ecela ukuba intombi le imethekelele ewoteleni kodwa unkazana lo uthi wesaba abazali bakhe.

Facebook Forum

XS
SM
MD
LG