amalinks wokungena

Breaking News

Izizalwane zeZimbabwe Zithi Kunzima Ukondla Abantwana Emazweni


Kunzima ukodla abantwana emazweni atshiyeneyo ngenxa yokutshiyana kwamasiko lemithetho.

Kuhlelo lwezizalwane zeZimbabwe ezihlala emazweni, ngoLwesithathu sixoxe ngokondliwa kwabantwana emazweni anjenge Bhilithane, iMelika, Australia lamanye.

Kulabanye abathi kunzima ukuthi abantwana bondliwe ngendlela ehambelana lesiko leZimbabwe njengoba imithetho yamazwe la itshiyana nxa umntwana elakho ukutshaywa ngoswazi, ancwetshwe kumbe akhuzwe ngokumthethisa.

Kulezizalwane zeZimbabwe eziseBhilithane ezingafika ezinhlanu ezisanda kuthathelwa abantwana kulelolizwe kulandela indlela abakhuze ngayo abantwababo. Akwaziwa ukuthi bakhuzwe njani loba nje kunakanelwa ukuthi abanye babo batshaywe ngoswazi ngendlela eyaziwayo eZimbabwe.

Ingcwethi kwezenhlalakahle kukazulu, uMnu. Ian Ndaba uthi akumangalisi ukuthi abanye abantwana bacina bethathwa luhlangothi lukahulumende eBhilithane nxa bengatshaywa ngoswazi kumbe bakhuzwe.

Uthi lokhu kwenziwa yikuthi imithetho yokondla abantwana eBhilithane iyatshiyana leye Zimbabwe.

Bakhuliswa njani-ke abantwana babazali abayizizalwane zeZimbabwe kwamanye amazwe?

Ukuze sihlaziye iStuido 7 ixoxe loNkosikazi Enia Ndlovu Dube osehlale eBhilithane okweminyaka elitshumi lantathu.

UNkosikazi Ndlovu uthi abazali bayesaba ukuhwabhela abantwana nxa besenza okungafunakaliyo.

"Asikwazi ukuthi kumele senzeni ngoba kuyethusa ukutshaya umntwana kumbe ukumhwabhela. Abanye abazali abavela eZimbabwe sebathathelwa abantwana ngenxa yokutshaya kumbe ukuhwabhela abantwana."

"Sesihlangana ezinkonzweni lapho esizama ukuqondisa abantwana sisebenzisa ilizwi leNkosi."

XS
SM
MD
LG