amalinks wokungena

Breaking News

Idale Lephalamende Lifuna Ukuhlawulisa US$5,000 Amalunga eMDC Okuthiwa Adelela uMnangagwa


FILE: Abanye abasekela ibandla leMDC basuswa ngenkani ngamapholisa behlabela edale lephalamende.
FILE: Abanye abasekela ibandla leMDC basuswa ngenkani ngamapholisa behlabela edale lephalamende.

Amalunga edale lephalamende awebandla leMDC abahlabela, bayala ukusukuma labaphuma uMongameli Emmerson Mnangagwa engena ephalamende balakho ukuhlawula inkulungwane ezinhlanu zamadola – US$5,000 yokudelela umkhokheli welizwe.

Lokhu kuphume kumbiko okhitshwe yikhomithi yedale lephalamende eye Privileges Committee.

Ikhomithi le ekhokhelwa ligqwetha njalo engummeli weMudzi South, uMnu. Jonathan Samkange owebandla leZANU PF, lethule lumbiko edale leSenate.

Kugwalo olujulileyo olwethulwe yikhomithi le, abazahlawuliswa imali efika ZWL$800,000 bagoqela uMnu. Job Sikhala loMnu. Settlement Chikwinya, okuthiwa beyesa umsebenzi wekhomithi kaSamkange.

Iqgwetha elilodumo, uSikhwicamfundo Lovemore Madhuku uthi amalunga edale lephalamende lawa ngempela aphambanisa.

“Bengayala ukubhadala bazabe sebephambanisa icala lokuba kabalaleleli idale lephalamende.”

Uthe labo abaxotshwayo kuzamele bamangalelwe emthethwandaba.

“Labo abaxotshwayo kuzamele iphamende iye emadale. Kuyabe sokumele beye kwamanye amadale ngoba sebephuzile ukubathonisisa.”

Kodwa omunye walabo abetheswa leli cala, uChikwinya, uthi icala lakhe kaliboni.

“Thina njengamalunga ephalamende asivumi ukumiswa phambi kwedale elilabantu bebandla leZANU PF kuphela. Ikhomithi eyayisithonisa kwakumele ibe labammeli beMDC. Akula mthetho othi kumele ngimele umongameli welizwe.”

Isikhulumeli seMDC-T, uMnu. Witness Dube, uthi kabavumelani lesinqumo sephalamende.

“Asivumelani lesinqumo esithethwe lidale lephamende, sibona engani isinqumo lesi asizange siphe amalunga ephalamende ithuba lokuba batsho ukuba lokhu bakwenzelani.”

Idale lephalamende lilawo amandla okubhadalisa abantu abangalihloniphiyo kumbe ukuleyisa njalo liyenelisa ukubhadalisa umuntu indleko zokwephula umthetho kumbe njalo ukuxotsha abantu abangahloniphi imthetho yalo.

Nxa lokhu kungahanjiswa emithethwandaba, amalunga lawa alakho ukubhekana lobunzima ngoba engasoze athole ithuba lokuphikisa loludaba.

Ikhomithi ithi njalo amalunga lawa azahle athathelwe incwadi zokuhambisa lendleko lezi kodwa azaqhubeka engamalunga ephalamende.

Kulabo abatholakale belecala abangamatshumi ayisitshiyagalombili lasikhombisa ngamalunga edale leHouse of Assembly kuthi abangamatshumi amabili lane ngabedale leSenate.

Abanye babo kabasekho lokuba khona ephalamende ngemva kokuxotshiswa kulawa madale womabili ngabebandla leMDC-T lelePeople’s Democratic Party.

Ikhomithi le iqale uphenyo lwayo ibuzisisa amalunga edale lephalamende lawa ngemva kwesicelo somlawuli wephalamende, uMnu. Jacob Mudenda, ngemva kwesicelo sika Mnu. Pupurai Togarepi webandla leZanu PF.

Amalunga ebandle leMDC Alliance ayesedale abikwa aqala ukubanga umsindo ngokuhlabela ingoma, amanye akazange azihluphe ngokuza edale ngalelo langa, amanye ayala ukusukuma aqhubeka ehlezi phansi kuthi amanye aziphumela phandle, okuyinto eyenzakala kahlanu ngesikhathi uMnangagwa ezokhuluma ephalamende.

Ekucubunguleni kwayo ikhomithi le, ithi ifumane ukuba inengi lamalunga lawa kawazisoli ngesenzo sawo.

XS
SM
MD
LG