amalinks wokungena

Zidla Phansi Ezikamagebhula ...

  • Joseph Njanji

UNhlanhla Dube, umqondisi wenhlelo weqembu leHighlanders FC.

Seliphenduke laba ngumthatshuzwa iqembu lomdlalo wenguqu ele Highlanders lona eselinqotshwe emidlalweni emithathu ilandelana.

Iqembu le Highlanders libhaxabulwe nge 3 ka nya liqembu le Ngezi Platinum ngoMgqibelo okuyimpumela etsho ukuba leliqembu lenelise ukuthola imiklomelo eyisikhombisa kuphela kumidlalo eyisikhombisa eliyidlale ngenyanga kaNtulikazi layonale ekaNcwabakazi.

Impumela yemidlalo yangempelaviki itshiye iqembu le Highlanders litshiywa ngemiklomelo elitshumi lesithupha liqembu elihlezi phezu kwengalane ele Chicken Inn lona elinqobe ele Hwange nge 1 ka nya ngoMgqibelo.

Emdlalweni olandelwe yilo owangoMgqibelo iqembu le Highlanders litshaywe ngele Tsholotsho njalo kulabalandeli abazwakale sebehlabela ingoma bevalelisa umqeqetshi uErol Akbay oyisizalwane selizwe leHolland bethi useyehlulekile.

Iqembu le Highlanders likhangelelwe ukuba lidlale lingekhaya lele Chapungu emdlalweni walo olandelayo njalo kulokwesabela ukuba nxa kungasalihambelanga kuhle enkundleni abalandeli labo bengavuka eseganga.

Ekhuluma mayelana lokungadlali kuhle kulezinsuku isiphathamandla seqembu le Highlanders, uNhlanhla Dube, uthe bayazizwa izikhalazo zabalandeli.

“Njengenkokheli yeqembu le Highlanders siyabazi ubuhlungu obuzwiwa ngabalandeli beqembu nxa iqembu lingaqhubi kuhle njalo siyabathembisa ukuba lesisimo kasisitshayi indiva.

"Kuyatholakala ebholeni ukuba iqembu liqhube gadalala kodwa siyabakhuthaza abaqeqetshi kanye labadlali ukuba basebenze kanzima ukuze baqale ukunqoba njalo ngoba kuqakathekile kumuli ye Highlanders.”

Engalaneni yemiklomelo iqembu le Highlanders lihlezi endaweni yesikhombisa lilemiklomelo engamatshumi amathathu lambili ikanti iqembu le Chicken Inn yilo elihlezi phezulu ngemva kweviki yamatshumi amabili lantathu lilemiklomelo engamatshumi amane lathoba minwe mbili njalo litshiya elihlezi endaweni yesibili ele Ngezi Platinum ngemiklomelo emibili.

Iqembu le Dynamos lihlezi endaweni yesithathu lilemiklomelo engamatshumi amane lanhlanu ngemva kokuba linqobe ele Yadah nge 2 ka nya njalo lilingene ngemiklomelo leqembu le FC Platinum elihlezi endaweni yesine njalo elitshaye ele Black Rhinos nge 1 ka nya.

Emsileni wengalane iqembu le Tsholotsho linqobe okwesibili kumidlalo yalonyaka lapho litshaya ele Shabanie Mine nge 2 ka 1 okutsho ukuba selilemiklomelo elitshumi lanhlanu kodwa kusamele libophe ziqine ngoba lihlezi endaweni yesibili nxa usuka ngaphansi kwengalane kuthi iqembu elihlezi phezu kwalo ele Hwange lilemiklomelo engamatshumi amabili.

Iqembu le Bantu Rovers lona elitshaywe nge 3 ka 1 ngele How Mine ngeSonto yilo elijeke amanye engalaneni lilemiklomelo elitshumi lambili.

Facebook Forum

XS
SM
MD
LG