amalinks wokungena

Breaking News

Abatsha Bangena Epulazini Lowalwa Impi Yenkululeko Ophikisa Ukwengezwa Kweminyaka Yokusebenza Kuka Luke Malaba


FILE: Abatsha abakubandla leZanu PF.

Abasakhulayo abakubandla leZanu PF sebengene epulazini lika Mnu. Frederick Mutanda, owalwa impi yenkululeko, owancedisana labanye ekuvimbeni ukuba kwengezwe iminyaka emihlanu yokusebenza kukamahluli omkhulu wedale leSupreme Court, uLuke Malaba.

Abezindaba abeZimLive babika ukuthi abasakhulayo laba, abafika phose amatshumi amathathu, bangene epulazini lika Mutanda ngoLwesibili besithi kusobala ukuba uphikisana lokwenziwa nguhulumende kaMongameli Emmerson Mnangagwa, owavumela ukuba uMalaba ahlale emsebenzini okweminyaka emihlanu kulandela ukufikisa kwakhe iminyaka yokuzalwa engamatshumi ayisikhombisa.

Kungakethulwa umthetho omutsha obizwa ngokuthi yiZimbabwe Constitution Amendment (Number 2) Act, uMalaba labanye bakhe bekumele batshiye umsebenzi bengafikisa iminyaka engamatshumi ayisikhombisa yokuzalwa.

UMutanda utshele iZimLive ukuthi abatsha laba bakhanya bekhokhelwa ngabaphathintambo bebandla elibusayo abathi kasekeli uhulumende.

Usesukile epulazini lakhe eMutorashanga esithi abasakhulayo laba balakho ukumbulala kumbe ukwenza okunye okungalunganga epulazini lakhe.

Kasenelisanga ukukhuluma ngodaba lolu loMutanda kanye labakubandla leZanu PF, abagoqela uMnu. Obert Mpofu, unobhala obona ngokutshiyeneyo.

Sehlulekile njalo ukukhuluma loMnu. George Charamba, isikhulumeli sika Mnangagwa, obengaphenduli umakhalekhukhwini wakhe.

Abahluli beHigh Court - uHappias Zhou, Edith Mushore loJester Charewa - bethula isinqumo esithi akukho emthethweni ukwengezwa kwesikhathi esokuthi uMalaba ahlale esikhundleni sakhe okweminyaka emihlanu.

Omunye wabaphanyeka udaba lolu emthethwandaba, uMnu. Kika Musa, umqondisi wenhlanganiso yeZimbabwe Human Rights NGO Forum, usephanyeke njalo emthethwandaba isicelo sokuthi kubotshwe uMalaba, okubikwa ukuthi usebuyele emsebenzini ngendlela eyephula isinqumo somthethwandaba.

Facebook Forum

XS
SM
MD
LG