Uhulumende weZimbabwe uthi omanjinela sebehlolisise idamu leManyera esiqintini seVumba esabelweni seManicaland bathola ukuthi umdulo walo ulokhu uqinile ngakho-ke akusamelanga abantu abahlala duzane lalo basuke.
Uhlangothi lukahulumende olubona ngezokwethulwa kwemibiko belwethule umbiko othi abantu abanengi bangagalula bengekela ukusuka kuleyondawo ngoba kade usudilika umduli wedamu lelo.
Uhlangothi lolu lwethule umbiko kusihlwa ngeSonto othi umduli wedamu leManyera uqine saka ngakho abantu bengalandeli lokhu obekwethulwe nguhulumende.
Uhulumende wethule umbiko lo ngesikhathi esithi kulabantu abalikhulu lamatshumi amahlanu lane - 154 ababulewe lizulu lesiphepho uCyclone Idai. Kodwa inkampani ezethula indaba ezigoqela iBritish Broadcasting Corporation leReuters zibika ukuthi kulabantu abangamakhulu amabili lamatshumi phose ayisithupha - 259 ababulewe lizulu leli.
Kubikwa ukuthi abafika phose amakhulu amabili – 187 – kababonakali kuthi njalo abangamatshumi amathathu lasithupha – 136 bagonjolozelwe ngamanzi.
UNkosazana Roselyn Mkandla osebenza esabelweni lesi utshele iStudio 7 ukuthi abantu lokhu bethithibele ngezulu lesiphepho ezibulele abanye babo.
Kusenjalo, abafundisi balungiselela ukuyaduduza abantu abanengi okumangalisayo abakhathazekileyo. Bathi kumele abantu laba bathotshwe inhliziyo zabo ngemithandazo langokuxoxa labo.
UMfundisi Josias Mudenda okhonza eMethodist Church uthi kuqakathekile kakhulu ukukhuluma labahluphekileyo eManicaland abalezihlobo labangane ezibulewe lizulu lesiphepho uCyclone Idai.
