amalinks wokungena

Breaking News

IHigh Court Ihlolisisa Isicelo Sika Marry Mubaiwa Sokuthoniswa Icala Lokuzama Ukubulala uChiwenga Esendlini Yakhe


UMarry Mubaiwa ubesemthethwandaba weHigh Court ngoLwesibili eHarare. (Columbus Mavhunga/VOA)
UMarry Mubaiwa ubesemthethwandaba weHigh Court ngoLwesibili eHarare. (Columbus Mavhunga/VOA)

Lokhu evalelwe entilongweni uMarry Mubaiwa, ikhosikazi lomsekeli kamongameli uRetired General Constantino Chiwenga, okuthiwa wayefuna ukubulala umyeni wakhe ngesikhathi egula okumangalisayo esesibhedlela kwele South Africa.

UMubaiwa umiswe emthethwandaba weHigh Court ngoLwesibili lapho abecela ukuhlawuliswa isibambiso sebail kulandela ukwetheswa kwakhe amacala agoqela elokuzama ukubulala umyeni wakhe, elokusebenzisa imali yeZimbabwe phandle kwelizwe okungekho emthethweni lokuzama ukulungisa amaphepha omtshado engavumelananga loChiwenga.

Igqwetha lakhe, uMnu. Taona Nyamakura, ucele umahluli wedale leli, uJustice Pisirai Kwenda, ukuthi uMubaiwa anikwe isibambiso sebail ngoba ngumuntu owaziwayo kakhulu eZimbabwe lakwamanye amazwe.

Lokhu kusekelwe ngamanye njalo amagqwetha kaMubaiwa abalisa uAdvocate Keith Kachambwa loAdvocate Sylvester Hashiti, abathi kungamanga okwethulwe ngabanye abantu enkantolo ukuthi uMarry Mubaiwa ulakho ukubaleka kwele Zimbabwe ngenxa yokuthi ulempahla enengi okumangalisayo phandle kwelizwe egoqela izindlu.

Amagqwetha la aphinde athi kawaboni ukuthi uMubaiwa engethusela abafakazi njalo icala lokuthi wayefuna ukubulala uChiwenga lingamanga ngoba walimala ezandleni kuze kudubuke ibhomba eWhite City Stadium koBulawayo ngomnyaka ka2018 emhlanganweni webandla leZanu PF.

Kodwa-ke umtshutshisi, uMnu. Lovert Masuku, uthi kulobufakazi obunengi obuveza ukuthi uMubaiwa wayefuna ukubulala uChiwenga njalo ulakho ukubaleka elizweni ngokwesaba amacala abhekane lawo.

UMantshi uKwenda uthi uzakwethula isinqumo sakhe engahlolisisa okwethulwe emthethwandaba ngabatshutshisi lamagqwetha kaMarry Mubaiwa.

UMubaiwa ukhangelelwe ukuthi uzahlala isikhathi eside entilongweni engatholakala elamacala okuzama ukubulala uChiwenga, ukusebenzisa imali yeZimbabwe phandle kwelizwe okungekho emthethweni njalo lokulungisa amaphepha omtshado engavumelananga loChiwenga.

Ukuze sihlaziye udaba lolu, sixoxe loMnu. Kucaca Phulu, igqwetha elilwela ilungelo loluntu njalo olilunge ledale lephalamende, othi kukhangelelwe ukuthi uMubaiwa athoniswe okusemthwethweni njalo anikwe isibambiso sebail nxa kumele asiphiwe.

Ingxoxo Esiyenze LoMnu. Kucaca Phulu
please wait

No media source currently available

0:00 0:02:49 0:00


XS
SM
MD
LG