Umthethwandaba usukhulule isizalwane seMelika, uNkosazana Martha O’Donovan owayebotshelwe ukuthi wathethisa owayengumongameli uMnu. Robert Mugabe.
Umtshutshisi uNkosazana Linda Gadzika utshele umthethwandaba eHarare ukuthi UNkosazana O’Donovan usekhululwe ngakho-ke uhulumende usezamthumezela amasamanisi nxa kumele icala lakhe lithoniswe.
UNkosazana O’Donovan wetheswa icala lokuthi wathuka uMugabe ngokubhala kuTwitter ukuthi usekhulile okumangalisayo njalo uyagula.
UMnu. Obey Shava, igqwetha lika Nkosazana O’Donovan lamukele okwethulwe ngumthethwandaba ngenjabulo esithi wayevele engelacala.
Igqwetha elililwela ilungelo loluntu, uMnu. Matshobana Ncube, uthi kusobala ukuthi amacala wonke ahambelane lowayengumongameli welizwe azaphelela emoyeni.
“Njengoba uMugabe engasekho embusweni kutsho ukuthi amacala asephelile. Khona nxa sinanzelela kahle kahle uzabona ukuthi amacala la kwakuyindlela nje eyokukhahlameza abantu nxa bethe bakhuluma lokho abakuvunyelwe yisisekelo sombuso welizwe esithi yi-freedom of expression obekusenza ukuthi uMugabe abengumuntu obekungamelanga achothozwe ngabantu, So, isisekelo sombuso sivumele abantu ukuthi nxa uyi-public office holder bakwazi ukuthi bakusole ngendlela ophethe ngayo iwofisi yakho.”
Uthe kumele umthetho lo ulahlwe nguhulumende olokhe elomlandu wokulungisa yonke imithetho ukuthi ihambelane lesisekelo sombuso welizwe.
