Iqula labamele uhlangothi lukahulumende olubona ngezamadolobho selifikile koBulawayo ukuya hlolisisa ukumiswa umsebenzi kukamabhalane nguMnu. Tinashe Kambarami, umsekeli kameya, uMnu. Solomon Mguni.
Iqula leli likhangelelwe ukuthi lizaqala umsebenzi kusasa ngesikhathi iziphathamandla zebandla leMDC elikhokhelwa nguMnu. Nelson Chamisa lisahlolisisa ukuxotshwa kuka Dube lokuxokozela edolobheni leli.
Kasenelinsanga ukukhuluma labakuqula leli. Iziphathamandla zedolobho lako Bulawayo ezigoqela uMguni zithi zizakhulumisana lequla leli ngokwenzakala koNtuthu Ziyathunqa.
UKambarami, owayebambe isikhundla sikameya owayekwele South Africa okwensukwana, wethesa uDube icala lokungasebenzisi ngemfanelo imali yedolobho leli, ukwehluleka ukulungisa udaba lwamanzi ahluphayo lokunye okunenginengi.
UMnu. Daniel Molokoele, isikhulumeli sibandla leMDC elikhokhelwa nguChamisa, uthi bazamelela okuzakwethulwa liqula leli lobanje ibandla lakhe lalo lihlolisisa okwenziwa nguKambarami.
UMnu. Joseph Tshuma, owake wamela iPelandaba-Mpopoma edale lephalamende ekubandla leZanu PF, uthi uhulumende ungenela kudaba lolu ngoba akuqedakali okwenzakala edolobheni lakoBulawayo elingaphansi kwebandla leMDC.
