Ibandla leMDC Alliance lithi lizaqhubekela phambili lisebenzisa ibizo leli loba selizasetshenziswa libandla leMDC-T elikhokhelwa nguNkosazana Thokozani Khupe kukhetho lwama by-elections oluzayo.
UDokotela Nkululeko Sibanda, isikhulumeli sikamongameli webandla leMDC Alliance, uthi uMaKhupe labanye bakhe benza lokhu betshotshozelwa libandla leZanu PF elikhanya lifuna kubuse ibandla elilodwa eZimbabwe.
USibanda uthi kabasoze babumbe elinye ibandla elizancintisa kukhetho oluzayo.
Kodwa uMnu. Khaliphani Pugeni, isikhulumeli sika MaKhupe, uthi iMDC Alliance ngeyabo.
UPugeni uthi kabasebenzelani lebandla leZanu PF.
Ibandla leZanu PF lithi kalilasandla kulokhu okwenzakala kuMDC Alliance. UMnu. Believe Gaule okubandla leli uthi kuyahlekisa okwenzakala kumabandla eMDC.
Igqwetha elilwela amalungelo kazulu, uMnu. Matshobana Ncube, uthi uChamisa kumele abumbe ibandla elitsha ngoba sebemthwalise amagabha avuzayo.
Kukhangelelwe ukuthi amabandla la azalwisana kakhulu ngokusebenzisa ibizo elithi MDC Alliance.