Kulabantu eZimbabwe abasekela ukutshengisela emigwaqweni okuzakwenziwa ngoLwesibili ngamalunga omanyano weMDC Alliance abakhonona ngokungaqhutshwa kahle kokhetho lwelizwe lonyaka.
Kodwa-ke bakhona njalo abathi lokhu akusoze kuguqule indlela okuzaqhutshwa ngayo ukhetho lwalonyaka.
Umanyano weMDC Alliance ukhala ngokuthi iZimbabwe Electoral Commission lokhe ilabantu asebeqhube ukhetho okwesikhathi eside abacatshangelwa ukuthi abanye babo bakubutho lesizwe lakuhlangothi lukahulumende lwamapholisa ensitha olwe Central Intelligence Organization njalo akukhanyi ukuthi kuzakwenziwani ngokudinda amaphepha okuvota.
Umanyano lo ufuna kubelengcwethi ezizahlola ugwalo lokuvota olwe voters’ roll lokuthi amabandla atshiyeneyo anikwe ithuba lokukhankasa emisakazweni yeZimbabwe Broadcasting Corporation lakumaphephandaba angaphansi kukahulumende.
Bathi lokhu ngokunye okuzabenza ukuthi bangene emigwaqweni ngoLwesibili batshengisele ukungathakazeleli okwenziwa nguhulumende kaMongameli Emmerson Mnangagwa osethembise ukuthi kuzakwenziwa ukhetho olubalulekileyo lonyaka.
UNkosikazi Sukoluhle Ndlovu, isakhamuzi seHarare, uthi uzabe ekhona ekutshengiseleni lokhu ukwenzela ukubamba ngamandla uhulumende ukuthi alungisise konke okusolwa ngumanyano weMDC Alliance.
“Mina idemonstration ezabakhona ngoLwesibili ngiyahamba ngizabe ngikhona. Ngilethemba lokuthi kuzakuba yikutshengisela okulokuthula. Kuqakathekile ukuthi sihambe ukwenzela ukuthi ilizwe lisizwe ukuze ababusayo besizwe, sifuna amaelectoral reforms, sifuna ukhetho olubalulekileyo. Sifuna iZEC itholalakale izwe ukukhala kwabantu kungabi yizinto ezikhulunywayo zingayenzwa. Sizahamba njalo iqakathekile.”
UNkosazana Melody Siziba, osekela ibandla leMDC-T elikhokhelwa nguMnu. Nelson Chamisa, uthi sokuyisikhathi sokutshengisa uhulumende ukuthi ukhetho lwalonyaka akufuzanga luqilibezelwe. Uthi uzabe ekhona emigwaqweni ngoLwesibili.
“Ngokubona kwami idemonstration yangoLwesibili yokuthi uhulumende akhengela ama reforms iqakatheke kakhulu ngoba uhulumende kasoze wathi abantu bakhuluma ezwe angathi uyisacuthe, ayisikho ukuthi uhulumende uyisacuthe, isikhathi esinengi nxa umuntu engazwisisi ucina usugada phezu kwesihlahla. Ngizahamba lami ngoba ngiyawafuna ama electoral reforms, nxa ngingasahambanga kutsho ukuthi angimeli abanye abantu ngizahamba.”
Lokhu kusekelwe nguMnu. Mlungisi Ncube, othi, kumele uhulumende eveze mgceke ugwalo lokuvota okukhanya engani ulusebenzisa ekuguquleni impumela yokhetho.
“Ukutshengisela lokhu okuzakwenzawe yiMDC mhlaka 5 June kuyinto enhle kakhulu nxa sikhangelele ukhetho lolu oluzayo ngoba siyananzelela ukuthi impumela zokhetho zabatshiya abantu bengazwisisi ukuthi kuhambe njani. Kuqakathekile ukuthi bazwisise ukuth abantu abaku voters’ roll ngabantu abaphilayo. Abaqoqa lokhu kutshengisela benze into enhle kakhulu, kukhangelelwe ukuthi kuzasebenza ukutshengisela lokhu.”
Kodwa kulabanye abakusolayo lokhu abanjengo Mnu. Raymond Mabidi abathi umanyano weMDC Alliance uchitha isikhathi ngokuthi abantu kumele batshengisele emigwaqweni bekhonona ngendlela ukhetho olulungiselelwa ngayo.
“Mina ngibona engani sebaphuza lokhu kwakumele ngabe bawenza kudala. Bengakhohlwa ukuthi ngesikhathi seGNU behluleka ukulungisisa lemthetho sebefuna ukuhlupha khathesi, kodwa kabayenze lilungelo labo.”
UXolisani Mabhena, kavumelani laye. “Khona kuqakathekile ukuthi iMDC ihle iphumise imibono yabo kanye lokungathakazeleli indlela iZANU PF ebamba lolukhetho ngoba singananzelela ngo2013 yasala isikhala isidliwe kukhetho, kwakungela muntu owayelalela. Kuqakathekile ukuthi ukhetho lungakwenziwa ihle iqale ukukhonona ngento ezinjengabo voters’ roll. Ngoba ingadliwa ngemva kokhetho akula muntu oyabe esayilalela ukuthi bakhokhona ngani. Kuqakathekile ukuthi iMDC itshengise umhlaba ukuthi ibandla le ZANU alikaquki ngoba babhizi beba ukhetho.”
UMnu. Lafios Dube uthi umanyano weMDC Alliance kwakumele wenze lokhu kudala hatshi sokusele isikhathi esifitshane sokuthi kwenziwe ukhetho lwelizwe.
“Isinqumo sebandla leMDC ukuthi liphikise ukhetho imithetho ingakaqondiswa kuyinto enhle kodwa udaba lolu ngibona engani luphuzile bekumele kube yinto okungabe baqala ukuhluphamana lohulumende kudala hayi ukumelela ukhetho.”
Ingcwethi kwezombusazwe, uMnu Richard Mahomva, uthi ibandla elibusayo kumele lamukele izikhalazo zamabandla aphikisayo.
“Umkhankaso lo okumele wenziwe yiMDC kutshengisa ukuthi balamalungela. Okuqakathekileyo kuyakhomba ukuthi amabandla alokungasuthiseki ngalulokhetho, yikho nxa uhulumende angenilisa ukuthi alungise lapho okulenxaki ukhetho lungaqhubekela phambili.”
Akwaziwa ukuthi kuzabe kulabantu abanengi kanganani emigwaqweni eHarare lapho abazaveza ukungathakazeleli kwabo ngezokhetho oluzayo.