Umanyano weMDC Alliance uthi uyasekela abantu abafuna ukutshengisela emigwaqweni ekupheleni kuka Ntulikazi abathi kumele ibandla leZanu PF lisuswe embusweni ngenxa yokwehluleka ukubusa.
Umkhokheli weMDC Alliance, uMnu. Nelson Chamisa, okhulume lozulu kumabonakude kulokhu okuthiwa yi-Electronic Rally ngeSonto, uthe abafuna ukutshengisela ngaphansi kwesihloko esithi #ZanuPFMustGo balelungelo lokwenza lokhu.
Inhlanganiso ezitshiyeneyo zithi abantu sebekhathele ngokuhlupheka ngakho-ke sesifikile isikhathi sokuthi bangene emigwaqweni besuse ibandla leZanu PF embusweni.
Kodwa abakubandla elibusayo bathi lokhu kuyafana lokugenqula ukulumende ngodlame. Ukuze sihlaziye udaba lolu, sixoxe loMnu. Prince Dubeko Sibanda, omele iBinga West edale lephalamende, loMnu. Joseph Tshuma, okubandla leZanu PF.
USibanda uthi kusobala ukuthi ibandla elibusayo seliphelelwe ngamacebo okuvuselela umnotho welizwe lokunye okufunwa nguzulu.
UTshuma uthi kumele umanyano weMDC Alliance umelele ukhetho oluzayo ngoba ibandla leZanu PF lakhethwa ngabantu ukuthi libuse okweminyaka emihlanu.
