amalinks wokungena

Breaking News

Abakubandla lePeople's Democratic Party Abaxotshwe Ephalamende Bathi Konke Lokhu Kwenziwe yiZanu PF


UMnu. Kucaca Phulu usanda kuxotshiswa edale lephalamende libandla lePeople's Democratic Party elikhokhelwa nguNkosikazi Lucia Matibenga. (Photo: Facebook/Kucaca Phulu)
UMnu. Kucaca Phulu usanda kuxotshiswa edale lephalamende libandla lePeople's Democratic Party elikhokhelwa nguNkosikazi Lucia Matibenga. (Photo: Facebook/Kucaca Phulu)

Omunye wabasanda kuxotshwa edale lephalamende, uMnu. Kucaca Phulu, uthi kuyamangalisa okwenziwe libandla lePeople’s Democratic Party elikhokhelwa nguNkosikazi Lucia Matibenga losomlomo wedale lephalamende, uMnu. Jacob Mudenda, okukhanya besetshenziswa libandla elibusayo elifuna ukubhidliza eleMDC Alliance, elikhokhelwa nguMnu. Nelson Chamisa.

UPhulu uthi ukuxotshwa kwakhe labanye bakhe, abagoqela uMnu. Tendai Biti loMnu. Settlement Chikwinya, kuveza sobala ukuba ibandla leZanu PF kalifuni abantu abaliphikisayo.

Uthi bonke abaxotshiweyo babekhuluma sonke isikhathi edale lephalamende ngendaba ezitshisayo ezinjengokwebiwa kwemali yelizwe, imithetho yokuncidezela uzulu lokunye.

UPhulu uthi umuntu osetshenziswe nguMatibenga ukubaxotshisa edale lephalamende kakho ngitsho lakancane kubandla labo.

“Okuhluphayo lapha yikuthi akusizi lokuya emthethwandaba ebanjwe libandla elibusayo ngoba kusobala okuzakwethulwa ngamadale la. Okwenzakalayo lapha yikuthi iZanu PF kayifuni abantu abayiphikisayo ngakho-ke sebebhidliza ngendlela ephezulu ibandla elikhokhelwa nguChamisa.”

UPhulu labanye bakhe baxotsha uMatibenga bakhetha inkokheli entsha eyePeople’s Democratic Party. Baxotsha uMatibenga besithi udlelana labantu abangaqedakaliyo.

Kodwa uMnu. Joseph Tshuma, okubandla leZanu PF, uthi uPhulu labanye bakhe baxotshwe libandla labo hatshi elibusayo.

“Kuyasimangalisa ukuthi umuntu engenza konke okubi kuthiwa libandla leZanu PF. Laba ngabantu abaxotshwe libandla labo hatshi eleZanu PF. Kabasiyekele thina ngoba kasilani lokuxotshwa kwabo.”

UMudenda usebala incwadi ezinengi ezivela kumabandla aphikisayo axotsha abanye babo. Uthi ulandela umthetho wedale lephalamende lesisekelo sombuso selizwe leZimbabwe.

EleMelika lithi ukuxotshwa kuka Phulu labanye bakhe kuveza ukuba ibandla leZanu PF lizama ukubhidliza eleMDC Alliance.

Ibandla leZanu PF liyakuphikisa lokhu lisithi eleMDC Alliance lathengisa ilizwe kudala ngakho-ke akumangalisi ukuba eleMelika likhala kangaka.

Badla Amalahle Abasanda Kuxotshwa Edale Lephalamende
please wait

No media source currently available

0:00 0:03:34 0:00


XS
SM
MD
LG