Ibandla leMovement for Democratic Change (MDC) elikhokhelwa nguMnu. Nelson Chamisa selisole ukuhlukuluzwa kwamalunga alo edale lephalamende ngamapholisa ngoLwesine ngemva kokwala ukusukumela uMongameli Emmerson Mnangagwa ngesikhathi engena kuleli dale elanda ukwethulwa kwebudget yomnyaka ozayo.
Amanye amalunga alelibandla athi alimele ekududulweni kwawo ngodlame njalo agijinyiselwe esibhedlela.
Omunye wawo nguNkosazana Thabitha Khumalo othi batshaywa langamapholisa ensitha.
UMaKhumalo uthi ucine ewela phansi ngoba ubesephela umoya kulandela ukukhahlanyezwa kwakhe ngamapholisa lama CIO.
Uthi bekungamelanga ukuthe basukumele uMnangagwa ngoba akulamithetho ethi kumele bakwenze lokho.
Kulimele amanye amalunga edale lephalamende adonswe ngenkani akhitshwa kuleyondawo ngamapholisa ebambisana lamapholisa ensitha.
Kulemithetho evimba ukuthi amalunga edale lephalamende engafinyelelwe loba ngubani nxa ekhuluma okutshiyeneyo esedale lelo.
UMaKhumalo uthi amapholisa kanye losomlomo wedale leli, uMnu. Jacob Mudenda bephule umthetho lo ngokukhahlameza amalunga ebandla leMDC.
Kodwa uMnu. Believe Gaule webandla leZanu PF uthi kuyamangalisa kakhulu okwenziwe ngamalunga edale lephalamende akubandla leMDC.
UGaule uthe batshengise ukungahloniphi uMnangagwa ongumongameli welizwe.
Uthe ilizwe lingeke lithuthuka amalunga ebandla leMDC akudale lephalamende engaqhubeka elwisana loMnangagwa.
