Ibandla leMDC ngoLwesine likhetha inkokheli entsha eMashonaland West okulabantu abanengi abancintisa isikhundla somngcinisihlalo abagoqela uMnu. Gift Konjana, owamiswa ukuba lilunga lebandla leli okweminyaka emihlanu esetheswa icala lokungalandeli izinqondiso zebandla leli elikhokhelwa nguMnu. Nelson Chamisa.
Kukhangelelwe ukuthi uMnu. Wilson Makanyaire uzanqoba kukhetho lokudinga umgcinisihlalo omutsha. Sokwenziwe ukhetho olufanayo ezabelweni ezibalisa iMatabeleland South, Matabeleland North leNkabazwe.
Abakhethwe ezabelweni bakhangelelwe ukuthi bazakhetha inkokheli yebandla leli ngenyanga ezayo emhlanganweni omkhulu oweCongress.
Kulabanye abakhala ngokuthi babanjwa ngamandla ukuthi bavotele abantu abazakhetha uChamisa ukuba ngomongameli webandla leMDC. Iziphathamandla zebandla leli ziyakuphika lokhu.
Akukacaci ukuthi ngubani ozangena ezikhundleni zomsekeli kamongameli lezinye ezimbalwa eziqakathekileyo loba kusobala ukuthi bazakuba balutshwana abadabuka eMatabeleland leNkabazwe abazangena ezikhundleni eziphezulu.
Ukuze sihlaziye udaba lolu, sixoxe loMnu. Dumisani Nkomo, ingcwethi kwezombusazwe, otshele umsakazo weStudio 7 ukuthi kuyethusa okwenzakala kubandla leMDC okwamanje.