Ibandla leMDC-T elikhokhelwa nguMnu. Douglas Mwonzora lithi kalikabambani lele MDC Alliance eMatabeleland South lapho okubikwa ukuba amalunga amabandla la asedonsa ndawonye esenzela ukunqoba kukhetho oluzakwenziwa ngomnyaka ka2023.
Iphephandaba leNewsDay libika ukuba uMnu. Bekezela Maplanka loMnu. Younger Moyo, abakubandla leMDC-T benze umhlangano ngempelaviki lamalunga ebandla leMDC Alliance bavumelana ukuba kwenziwe lokhu njalo kungasaxotshwa kumakhansili lakudale lephalamende abadlelana loMnu. Nelson Chamisa.
Bathi kubisela muva amabandla aphikisayo ukuwabona esilwa nsukuzonke. Kasenelisanga ukuxoxa ngodaba lolu loMoyo loMaplanka.
Kodwa uMnu. Witness Dube, obona ngokwethulwa kwemibiko kubandla leMDC-T, uthi ibandla lakhe kalazi lutho ngokwenzakale esabelweni seMatabeleland South.
UMnu. Felix Magalela Mafa, umsekeli wesikhulumeli sebandla leMDC Alliance, uthi akumelanga amabandla aphikisayo adlephane.