Ibandla leMDC-T elikhokhelwa nguMnu. Douglas Mwonzora lithi likhalela ukuthi kuguqulwe indlela okuqhutshwa ngayo ukhetho eZimbabwe hatshi ukuba kungenziwa ukhetho ngomnyaka ka2023.
UMnu. Witness Dube, ophethe uhlangothi lokwethulwa kwemibiko kubandla leli, uthi bafisa ukuba kuguqulwe indlela okukhankaswa ngayo, ukubalwa kwamavoti, ukwethulwa kwempumela yokhetho lokunye.
UDube uthi kungalungiswa lokhu kuzakwenza ukuthi amabandla wonke engaxokozeli ngesikhathi sokhetho njengalokhu okwenzakala ngomnyaka ka2018 kuze kubulawe abantu abayisithupha libutho eHarare.
Abantu batshengisela emigwaqweni besithi kumele kwethulwe ngesiphangiphangi impumela yokhetho lukamongameli. Abanye ababulawa ngamasotsha ngabantu ababesihambela edolobheni leli.
Umkhokheli webandla leMDC-T, uMnu. Douglas Mwonzora, utshele intathelizindaba eHarare namuhla okwethulwe nguDube esithi bazama ukuxoxisana lohulumende ngokulungisa indlela ukhetho oluqhutshwa ngayo eZimbabwe.
Kodwa omunye wabo, uMnu. Morgen Komochi, utshele umsakazo weStudio 7 ukuba kungcono kungenziwa ukhetho kuze kulungiswe konke okuhluphayo.
UDube uthi kabakuthakazeleli ukuba kumiswe ukhetho oluzayo.