Uthabilie uNkosazana Thokozani Khupe labanye bakhe abakubandla leMovement for Democratic Change (MDC-T) asebengene edale leHouse of Assembly leleSenate kulandela ukuxotshiswa kwalabo ababedlelana loMnu. Nelson Chamisa, okubandla leMDC Alliance.
UMaKhupe uthi lokhu kwenziwe kulandelwa isinqumo senkantolo yeSupreme Court esithi uChamisa kangenanga esikhundleni sikamongameli weMDC kulandelwa imithetho yebandla leli.
Abanye abantu batshayela uMaKhupe ihlombe kubelabanye abachothoza akwenzayo besithi kuveza ukuthi udlelana lebandla leZanu PF.
Uyakuphikisa lokhu esithi balandela okwethulwa yiSupreme Court lonyaka. Akucaci ukuthi ibandla leMDC-T lizakwenzelani uzulu ngokungena kwamalunga alo emadale la abumba imithetho eZimbabwe.
Abakubandla leMDC Alliance bathi okwenziwa nguMaKhupe yikuthakazelela izikhundla hatshi ukulwela okufunwa nguzulu.
UMoyo uthi ibandla leli lizalwela abantu bonke kwele Zimbabwe njalo lilungiselele ukhetho oluzakwenziwa ngomnyaka ka2023.
Uthi lizazama ngamandla wonke ukuthi lilungise imigwaqo emadolobheni lemaphandleni libumbe lemithetho ethakazelelwa nguzulu.
Kodwa uMnu. Ndaniso Mpande, isakhamuzi seGwanda esithakazelela ezombangazwe, uthi akulalutho oluzakwenziwa nguMaKhupe labanye bakhe njengoba sebeleminyaka edlula engamatshumi amane bemelele okwathenjiswa libandla leZanu PF.
