amalinks wokungena

Abantu Emaphandleni Bafundiswa Ngobudlwangudlwangu Bebulenjini beInternet


Izakhamizi zeCabatsha zilalela obafundisa okwenzakala ebulenjini beInternet.

Abenhlanganiso ebona ngezamalungelo abezindaba eyeMedia Institute of Southern Africa Zimbabwe, sebesungule uhlelo lokubhoda ngelizwe befundisa uzulu ngelungelo labo kwezokusetshenziswa kwenkundla zebulenjini lokubunjwa komthetho wokubalawula ekusebenziseni inkundla lezi.

Abahlali beCabatsha kuWard 2 koBulawayo, ngoLwesithathu bathe gwaqa okwamahola amabili befundiswa ngobulembu beInternet, amalungelo abo lamacala abangahlangana lawo ngesikhathi bekhulumisana labanye ebulenjini.

Ekhulumisana labahlali beCabatsha, umhleli wezobulenjini eMISA Zimbabwe, uNkosazana Koliwe Nyoni-Majama, uthe bakubone kuqakathekile ukuphuma ijumo bayekhulumisana lozulu ezigabeni zonke zelizwe ngesikhathi kulungiselelwa ukhetho lomnyaka ozayo.

Uthe abantu ababumba umthetho kumele beqakathekise amalungelo abantu ekusebenziseni ubulembu ngoba lesisekelo sombuso sikhuluma ngamalungelo oluntu kwezemibiko.

Isakhamuzi seCabantsha, uMnu. Lazarus Masuku, ubonge kakhulu uhlelo lokufundiswa ngobulembu ethi lubavule amehlo.

Esinye njalo isakhamuzi seCabatsha, uMnu. Mandlenkosi Ncube, uthe ubulembu kanye lenhlelo eziza layo yizinto ezinhle kodwa ziyasinda uma sekuyiwa ekhethweni.

UNkosikazi Nobuhle Ncube uthe ufunde okunengi njalo uzayabela abanye ngakufundileyo mayelana lobulembu.

EZimbabwe sekulabantu abambalwa asebethe babotshwa ngesikhathi bethumela imibiko besebenzisa inkhundla ezehlukeneyo zebulenjini, kunyanga edlule.

UMfundisi uEvan Mawarire ubotshelwe ukuthumela umfanekiso owevideo enkundleni eye Facebook, kuWhatsapp lezinye ngokuswelakala kwamafutha ezimota ezweni.

Facebook Forum

XS
SM
MD
LG