UMongameli Emmerson Mnangagwa uthi owayengumongameli welizwe leZimbabwe, uMnu. Robert Mugabe, wazisukela esikhundleni hatshi lokhu akukhulumayo ukuthi wabanjwa ngamandla nguye lebutho ukuthi asuke embusweni.
UMnangangwa wethule umbiko othi uMugabe wenza lokhu elandela iziqondiso zesisekelo sombuso welizwe kusigaba 96 kusiqu sakuqala seConstitution of Zimbabwe.
“Ulelungelo lokukhuluma akufunayo njengawonke umuntu welizwe leZimbabwe ozimele yedwa. Uhulumende welizwe leZimbabwe wenza konke okumele akwenzela umuntu owayengumongameli. Simnika konke okumele akothole njengalokho okuhlelwe kusisekelo sombuso welizwe leZimbabwe.
“Okumele akunanzelele yikuthi sesidlulile kusibagaba lesi akhuluma ngakho. Esikwenzayo okwamanje yikulungiselela ukhetho okumele lube ngolubalulekileyo. Lokhu yinto eqakathekileyo kakhulu ezakwenza ukuthi abantu beZimbabwe bahlale kahle njengoba umnotho wabhidlika okumangalisayo njalo siphila sodwa.”
UMugabe uthi uMnangagwa wasebenzisa ibutho ukuthi amsuse esikhundleni ngoLwezi ngomnyaka ophelileyo.
Uthi banengi abantu abagongodwa libutho abagoqela amapholisa ensitha akuhlangothi lukahulumende olwe Central Intelligence Organization, amapholisa labanye ababengasekeli uMnangagwa.
Uthi kumele bakhulumisane loMnangagwa ngodaba lolu ngoba wahlukuluzwa okumangalisayo labanye bakhe abagoqela uProfessor Jonathan Moyo, uMnu. Saviour Kasukuwere, uMnu. Patrick Zhuwao labanye ababekucele leZanu PF elibizwa ngokuthi yiGeneration 40 ababefuna ukuthi uNkosikazi Grace Mugabe angene esikhundleni sakhe.