Idale lebandla leMovement for Democratic Change (MDC) ele National Council selikhethe omunye wabasekeli bakamongameli, uMnu. Nelson Chamisa, ukuba aphathe isikhundla sika muyi uMnu. Morgan Tsvangirai, obhubhele kwele South Africa ngoLwesithathu.
Abantu abakhalale ukuya emhlanganweni lo bagoqela abasekeli bakamongameli webandla leli uMnu. Elias Mudzuri loNkosazana Thokozani Khupe kanye lomgcinisihlalo weMDC-T, uMnu. Lovemore Moyo labanye abaphikisa okwenziwa nguChamisa.
Lokhu kwenziwe ngesikhathi kulabantu abanengi abathe gwaqa phandle kwesigodlo sebandla leli eHarare lapho abakade bekhalela imuli kaTsvangirai ngokubhubha kwakhe.
Umhlangano weNational Council wenziwe njengalokho obekukhangelelwe libandla leli ebelingacabangeli ukuthi uTsvangirai engabhubha.
Lumhlangano ubikwa ungenwe ngamalunga alikhulu lamatshumi ayificaminwe munye (190) phakathi kwabantu abangamakhulu amabili letshumi lanhlanu, (215).
Umsekeli kamgcinisihlalo webandla le MDC-T, uMnu. Morgan Komichi, uthi bakubone kufanele bakhethe uChamisa ukubamba isikhundla sikamongameli.
UChamisa wemukele lelinyathelo elithethwe ngamalunga eNational Council esithi kumqoka ukuba ibandla liqhubekele phambili lisebenza kufezeke okwakufiswa ngumuyi kungela kuphambuka kuziqondiso zebandla.
USenator Lillian Timvious, osebenza eseZvishavane, eNkabazwe, uthi ukukhethwa kuka Tsvangirai kukhangelelwe ukuthi kuzaqeda ukulwisana kubandla leli.
Kodwa-ke uMnu. Douglas Mwonzowa, unobhala jikelele webandla leli, uthe akwenziwanga ngemfanelo ukukhethwa kuka Chamisa.
Uthe kumele ibandla leMDC-T lenze umhlangano weExtra Ordinary Congress ukwenzela ukukhetha umongameli omutsha webandla.
Abakhangele okwenzakalayo bathi kuzaqhubekela phambili ukulwisana phakathi kwebandla leli.