Umkhokheli webandla eliphikisayo eleMovement for Democratic Change (MDC-T), uMnu. Morgan Richard Tsvangirai, ngoLwesihlanu uhlangane lezakhamizi zakoBulawayo labenhlanganiso ezizimeleyo lapho akhuthazwe khona ukuthi kumele ahloniphe amalungelo abesifazane njalo angakhethi abantu okumele bamele ibandla lakhe kukhetho lwesizwe ngomnyaka ozayo.
UMnu. Tsvangirai uphakathi kohlelo lokwethekelela izigaba ezehlukeneyo zelizwe edinga imibono kazulu leyabenhlanganiso ezimela ilungelo likazulu ngesikhathi kulungiselelwa ukhetho.
Esuka koBulawayo ukhangelelwe ukuthi uzakuya ePlumtree lapho azahlangana khona lezakhamizi endaweni ezitshiyeneyo.
Uzulu koBulawayo uhle wethulela uTsvangirai akucabangayo ngaye lebandla lakhe. Emhlanganweni awenze edolobheni leli, bamtshele ukuthi angaqali lokho ajayele ukukwenza ukuthi uyakhethela abantu labo okumele bemele ibandla lakhe nxa kudingwa abazamele iziqinti ezitshiyeneyo edale lephalamende lakukhetho lwamakhansili.
Unobhala wenhlanganiso yeBhetshu LikaZulu olwela amalungelo oluntu, uMnunzana Mbuso Fuzwayo, uthe ngokhetho luka2018 bakhangelele ukuba wonke amabandla kungabi labantu bokuza abazogcwalisa uhlelo lweGrand Plan.
IGrand Plan inakanelwa ukuthi lugwalo olwalotshwa libandla leZanu PF ilizwe selizaba lozibuse lapho okwabekwa sobala ukuba kumele abantu beMatabeleland leMidlands bancindezelwe ngendlela ezitshiyeneyo.
Ibandla le Zanu PF kalikakhulumi kangako liphikisa kumbe lisekela ugwalo lolu.
OSakhulayo okunhlanganiso yeBulawayo Youth Arise, uMthokozisi Ndlovu, ugcizelele esithi koBulawayo abantu abazangena kukhetho luka2018 kumele babe yizizalwane zeMaNdebeleni ngoba umuntu wokuza ngeke abamele njalo azwisise inhlupho zabo.
Omunye njalo osakhulayo wakoBulawayo, uNicole Casandra, uthe abantu labo kumele kube ngabantu abahloliweyo njalo abangela bugwelegwele.
Esinye isakhamuzi sakoBulawayo esilwela amalungelo abomama, uNkosazana Jacquilne Ndlovu, uthe uTsvangirai akahloniphi isisekelo sombuso sebandla lakhe njalo balokwesaba ukuthi ngokhetho oluzayo ulakho ukuvalela phandle abesifazana nanku sewadinga abesilisa ababili abasuka empumalanga ukuba babengabasekeli bakhe.
Lokhu kusekelwe ngabantu abanengi abathe kumele uTsvangirai alalele konke abamethulela khona.
UMfundisi Anglistone Sibanda uthe ngendlela akhulumisane ngayo lomkhokheli weMDC-T ubone mhlophe ukuba ngokhetho luka2018 uzaba lakho ukuqhubekisa injongo yakhe yokuphumelelisa uhlelo lweGrand Plan.
IZimbabwe lokhe yavela kukhetho luka2013, ibandla leMDC-T lenza isinqumo sokuthi abasoke baphatheka kukhetho phakathi kwesikhathi kungakenziwa inguquko kuzimiso zokhetho kodwa ngo2018 bakhangelele ukungena.
Amabandla abalisa iANSA leMRP athi azancintisa eMaNdebeleni kuphela, iZAPU ithi ilizwe lonke jikelele njalo sebeqalisile ukukhetha abazabamela izigaba ezithize nomanje kulenkulumo zokuthi amabandla aphikisayo angene kukhetho ebambene.