amalinks wokungena

Breaking News

Ukubhubha Kuka Tsvangirai Kutshiya Abantu Bedabuke Inhliziyo


FILE -UTsvangirai ukhuluma lentathelizindaba endlini yakhe eHarare.

Izakhamizi zeGwanda zithi zidane okumangalisayo ngokubhubha kukamongameli webandla leMDC, uMnu. Morgan Tsvangirai.

Inengi selikhuthaze inkokheli zalelibandla ezilwisanayo ukuthi zibambane ukuze zifeze izifiso zikaTsvangirai.

Inengi emaphandleni eGwanda belilokhu lisemnyameni ngokbhubha kukaTsvangirai namhla yena obhubhele kweleSouth Africa ngoLwesithathu njalo liveze ukwethuka ngombiko othi kasekho.

UMnu. Edgar Ncube, owesiqintini Simbuka, njalo engunobhala jikelele wabasakhulayo kubandla leMDC uthi njengabatsha bebelethemba yekusasa engcono phansi kobukhokheli bukaTsvangirai.

Ugogo uLetwina Sibanda oweNsimbi uthi ilizwe leZimbabwe lonke lilahlekelwe kakhulu ngokubhubha kukaTsvangirai.

UMnu. Gabriel Moyo oweMawane njalo ekubandla leMDC uveze ukudana okukhulu esithi uTsvangirai ubhubhe ngesikhathi sebekhangelele ukuthi uzanqoba kukhetho kubelentuthuko elizweni.

UNkosazana Molly Ncube laye osuka eMawane uthi badabuke kakhulu ngokuzwa ukuthi uTsvangirai sedlulile kulumhlaba.

UMnu. Dingumuzi Mpofu oweNtepe yena uthi uTsvangirai utshiye abantu bemadolonzima njalo kuzakuba nzima ukuthi Ibandla leMDC lithole eyinye Inkokheli efana laye.

UTsvangirai ubhubhele kweleSouth Africa lapho abeselatshwa umkhuhlane wemvukuzane njalo utshiya ibandla leMDC limi manzonzo kulokudonselana kubangwa isikhundla sakhe.

KoBulawayo, kulabantu abathi bazakhumbula uTsvangirai njengeqhawe elikhulu elalilesibindi esokumelana lokuhlukunyezwa nguhulumende kaMugabe.

Owasebenza loMnu. Tsvangirai ngesikhathi ekuhulumende womanyano, uMnu. Samukele Hadebe, uthi udabukile kakhulu ngokubhubha kukaTsvangirai.

Uthi uTsvangirai uqhubile iqhaza lakhe njalo uzakhunjulwa ngemizamo yakhe yokulwela inkululeko yabantu beZimbabwe.

Olombono ofanayo, uNkosikazi Babra Tanyanyiwa owasebenza loTsvangirai kunhlanganiso yezisebenzi eyeZimbabwe Congress of Trade Unions, uthi ukhumbula uTsvangirai ngesibindi ayelaso sokulwisana kokunyathezelwa kwamalungelo ezisebenzi njalo ekhokhela ukutshengisela kwezisebenzi ngokungayi emsebenzini, ama- Stay Away.

Ohlaziya ezombusazwe, uMnu. Butler Tambo, uthi uTsvangirai uzakhunjulwa njengomuntu owama ngesibindi elwisana lohulumende kaMugabe.

Facebook Forum

XS
SM
MD
LG