Inhlanganiso ezilwela amalungelo oluntu eZimbabwe zithi uhulumende wehluleka ukulandela iziqondiso ezethulwa yikhomitshini eyayikhokhelwa ngowayengumongameli wakwele South Africa eyacubungula udlakela olwenzakala elizweni kusanda kwenziwa ukhetho ngomnyaka ka2018. Kodwa uhulumende uthi kunengi akwenzayo.
Ikhomishini eyayikhokhelwa nguMnu. Kgalema Motlanthe, yathi kumele uhulumende abumbe ikhomithi ezakhangela inswelo zabafelwa yizihlobo okugoqela ukuhlawula imali yezifundo zabantwana, njalo kulungiswe ubudlelwano bukazulu elizweni kuhlolisiswe lemithetho yokuvota lokwethulwa kwemibiko yokhetho.
Ikhomishini le yathi kumele kulungiswe okumele kwenziwe ngamasotsha nxa ecelwe ukuba angene emphakathini nguhulumende njlalo kubotshwe bonke abadubula abantu eHarare.
UMnu. Ziyambi Ziyambi, ophethe uhlangothi lukahulumende olubona ngezemithetho, uthi sebelungise phose konke okwethulwa yikhomishini le ngaphandle kwemithetho yokhetho. UZiyambi usanda kutshela iphephandaba leSunday Mail ukuba abafelwa yizihlobo kumele bayekuhlangothi olubona ngenswelo zikazulu olweSocial Welfare.
Kasenelisanga ukukhuluma ngodaba lolu loMnu. Paul Mavima, ophethe uhlangothi lolu.
UNkosikazi Alison Charles, olesihlobo sakhe uGavin Dean Charles owadutshulwa ngamasotsha, uthi kumele uhulumende abahlawule ngesehlakalo lesi.
Bayakhonona abantu abanengi abathi sekuleminyaka emithathu kungalungiswanga ngitsho lokukodwa okwethulwa yikhomishini kaMotlante. UMnu. Mlungisi Dube, ingcwethi kwezombusazwe, uthi uhulumende kenzi lutho ngodaba lolu.
Lokhu kusekelwe nguMnu Witness Dube, obona ngokwethulwa kwemibiko kubandla leMDC-T, elikhokhelwa nguMnu. Douglas Mwonzora.
Kudaba lokuba abamabandla bakhulumisane, ingcwethi kwezombusazwe zithi lokhu kumele kwenziwe kungela kudlala umacatshelana njengalokhu okwenzakala kumbuthano owePolitical Actors Dialogue. UMnu. Mabutho Moyo, okubandla leZANU PF, uthi bazama ngamandla wonke ukuba balungise okwehlela abantu.
Ibutho labulala abantu abayisithupha kulandela ukutshengisela kwabantu ababefuna ukuthi kwethulwe ngesiphangiphangi impumela yokhetho lukamongameli ngomnyaka ka2018. Osengumongameli, uMnu. Emmerson Mnangagwa, wanqoba kukhetho lolu impumela yalo eyaphanyekwa emthethwandaba weConstitutional Court.
UMnu. Nelson Chamisa, okhokhela ibandla leMDC Alliance, lokhu esithi wanqoba uMnangangwa. Akwaziwa ukuba udaba lweMotlanthe Commission luzalungiswa kumbe hatshi kungakafiki ukhetho oluzakwenziwa ngomnyaka ka2023.