amalinks wokungena

Breaking News

Amalunga eMthwakazi Republic Party Ethekelela Amapholisa Ekhala Ngokwephulwa Kwamalungelo Abantu


UMnu. Mqondisi Moyo

Amalunga ebandla leMthwakazi Republic Party (MRP) ethekelele amapholisa koBulawayo enkambeni eyeZRP Central kanye leyeSouthampton bebuzisisa ukuthi kungani amapholisa ehlukuluza abantu nxa beqhuba umsebenzi wokuhlola ukuthi uzulu uyalandela iziqondiso zeCOVID -19.

UMongameli webandla leMRP, uMnu. Mqondisi Moyo, uthi kuvamile ukubona amapholisa ehlukuluza abantu emigwaqweni.

“Thina sithi lokhu kulinyathelo elibi elenziwa ngamapholisa lamasotsha ngoba bahlukumeza abantu. Kuviki elidlulileyo kuroadblock yaseMakhandeni abantu babonakale bedliswa amatshe ngamasotsha lamapholisa. Lokhu akusiphathanga kahle ngengebandla leMRP. Yikho sisithi thina abantu abalohlupho lokuhlukunyezwa ngamasotsha lamapholisa abasitshele thina sincedisane labo ngoba into abayenzayo ayikho emthethweni njalo sithi uhulumende kaMnangagwa sesebenzisa yonaleyi indlela yokuhlukumeza abantu esesaba ukuthi mhlawumbe abantu babethe bazamvukela babhikitshe mhlaka 31 July. Sithi thina kunjalo njengebandla leMRP abantu abafunde ukwazi amalungelo abo.”

UMnu. Calvin Wiseman Dube, umsekeli kamgcinisihlalo wabatsha kuMRP, uthi ikusasa labo selibulewe kodwa injongo yabo ayimiswanga.

“Njengabantu abatsha beMthwakazi sithethe lesisingqumo sokulwela uluntu lwethu lamalungelo ethu lamalungelo omuntu ownke kungenani ukuthi bathini, lokuthi bafisa ukwenza kanjani. Okumqoka engiqonde ukukutsho yilokhu njengabantu beMatebeleland sihlukuluzwe kakhulu nguhulumende lowu okhona sathi sesikhangele siyabona ukuthi ikusasa lethu selibulewe laqedwa yilabo abasibusayo ...”

UNkosazana Presia Ngulube, olilunga leMthwakazi Republic Party, uthi bayaziqhenya ngokwenziwe yintsha yebandla labo.

“lntsha yeMthwakazi Republic Party isebenzile kakhulu ukuthi iyebuzisisa emapholiseni ukuthi kungani bephatha abantu kabi kumaroadblocks akoBulawayo. Njengentsha kufanele ukuthi kubeyibo abafundisa abantu ngamalungelo abo. Intsha yeMRP iyabonisa ukuthi umthetho iyawazi umthetho ofakwe eZimbabwe khathesi under COVID uthi abantu sebengahamba etown bengelawo ama pass kodwa amapholisa alokuthatha umthetho awufake ezandleni zawo aqale ukuhlukumeza abantu kumaroadblocks. Ngiyabonga kakhulu kuntsha yeMRP njalo ngibatshayela izandla ukuthi bavuse amehlo kazulu njalo kube yibo abavikela uzulu.”

URodney Ncube, umqoqi wenhlelo kubandla leMRP, uthi bafuna ukuzwisisa ukuthi amapholisa akwenzelani ukubuza uzulu incwadi zokuhamba.

Ibandla leMthwakazi Republic Party lithi isinqumo esethulwa lidale leHigh Court mhlaka 29 Ntulikazi mayelana lamalungelo abantu okuhamba bekhululekile edolobheni yiso esenze ukuthi basukume balwe ngoba inengi likazulu lihluthunelwe amalungelo abo.

Facebook Forum

XS
SM
MD
LG