amalinks wokungena

Breaking News

Mthuli Ncube: Umnotho Welizwe Uyaphumelela Loba Kulomkhuhlane weCOVID-19 Lokunye


UMnu. Mthuli Ncube (AP)
UMnu. Mthuli Ncube (AP)

Umphathintambo wezemali, uMnu. Mthuli Ncube, uthi umnotho wakwele Zimbabwe uyaphumelela loba kulenhlypho ezinengi ezilethwe yikumemetheka kwegciwane leCOVID-19.

UNcube ukhulume amazwi la ngesikhathi esethula umbiko woluhlu lwendleko zika hulumende lwaphakathi komnyaka, iMid-Term Policy Review.

Uthe uhulumende kaMongameli Emmerson Mnangagwa uyathokoza ngesimo somnotho welizwe.

UNcube uthe kungelani lokuba kulobhubhane lweCOVID-19, isivuno esitholwe lilizwe ngomnyaka ophelileyo sinikeza ithemba lokuba umnotho weZimbabwe usezandleni ezenelisa ukuwuphatha kahle.

Uthe intengo yempahla lemali esetshenziswa nguzulu lokhe iqhubeka isiba lesisindo ngoba uhulumende esenelisa ukulungisa indaba ezibhekane lomnotho nxa kuqathaniswa lakudala.

Uphinde wathi indlela zokulwisana leCOVID-19 ezifana lokuthengwa kwamajekiseni alolubhubhane leziqondiso zeCOVID-19 lockdown zisize kakhulu ukuvuselela umnotho.

“Ukuvuka komnotho wethu kubangelwa lizulu elinengi esibe lalo kumnyaka ka2020-2021, ndawonye lentengo ephuzulu yalokho esikwembayo emigodini yethu. Indlela esisebenze ngayo ukulwisana lomkhuhlane weCOVID-19 layo isisize kakhulu.”

UNcube uthe eleZimbabwe selisebenzise imali enengi ukuthenga amajekiseni okuvimba ukumemetheka kwegciwane leCOVID-19.

“Sifuna ukugcina impilo zabantu sisebenzisa imali esiyithole kumnyaka odlulelyo, kuze kube namhlanje sesisebenzisa imali efika 93 million US, sithenga amajekiseni Ecovid-19.”

Lobanje uNcube esithi uyathaba ngesimo somnotho welizwe izisebenzi ziyakhonona kakhulu ngamazwi akhe zisithi akusiqiniso ukuba umnotho welizwe uyathuthuka.

Unobhala jikelele wenhlananiso yezisebenzi, eyeZimbabwe Congress of Trade Unions, uMnu. Japhet Moyo, uthi abantu bathwele nzima eZimbabwe nxa kukhengelwa lokhu okwethulwe nguNcube.

Lokhu kusekelwe ngeyinye ingcitshi kwezomnotho, uMnu. Masimba Kuchera, othi uhulumende kumele azinuke amakhwapha ngamanga kaNcube.

“Masikhangela imali esiziphiwa ngubaba uNcube kukhanya engani umnotho uyakhula kodwa thina njengabantu asikaboni impilo yethu ikhwela. Impilo yethu lokhe inzima. Abantu badla nzima, angazi ukuba umnotho ukukhula kwawo kunceda njani abantu makhaza.”

UNcube uphinde wathi uhulumende usebeke imali efika ama billion alitshumi lane ($14 billion) yase ZImbabwe ukunceda abantu abadubekayo elizweni, lobanje ingcitshi zikhonona ukuba abantu abanengi kabakayitholi limali.

UNcube uthe kusukela manje kusiya phela umnyaka ka2021 uhulumende uzabe esebhadele izikwelede zakhe ukuze eleZimbabwe lenelise ukuqhubeka lithola usizo kwamanye amazwe. Wathi njalo kakusoze kube lemali ezaphiwa inhlangothi zikahulumende esithi leyo abayithola kundleko zalonyaka kuhlelo lwe-budget yenele ukuba ingatsha lezi zisizakale uze uye phutsha umnyaka.

XS
SM
MD
LG