amalinks wokungena

Abalandeli beZanu PF Bafola Ezitaladini Beveza Ukuthakazelela uGrace Mugabe

  • Mavis Gama

Members of the Zanu PF Youth League marching in Harare on Wednesday.

Abalandeli bebandla le Zanu PF bafola edolobheni leHarare ngoLwesithathu besithi basekela uNkosikazi Grace Mugabe okuthiwa watshaya uNkosazana Gabriella Engels kwele South Africa amthola alabantwana bakhe ewoteleni eJohannesburg.

Baphinde bathi basekela ngokugcweleyo uMongameli Robert Mugabe ochothozwa ngabantu abanengi ebulenjini bokuzilibazisa obeFacebook abathi kasenelisi ukubusa ilizwe ngenxa yokuluphala.

Ukufola lokhu bekukhokhelwa ngamalunga ebandla le Zanu PF abakuhlangothi lweYouth League.

Abakhulume emhlanganweni lo bagoqela uNkosikazi Manditawepi Chimene, uMnu. George Mlala, uMnu. Ignatius Chombo lezinye iziphathamandla zebandla leli abathe basekela abafole bethakazelela konke okwenziwa nguNkosikazi Mugabe.

Inkulumo yomhlangano lo ibigudla iguma okutshengisa ukuthi bekusolwa kakhulu elinye icele lebandl le Zanu PF elisekela uMnu. Emmerson Mnangagwa, umsekeli kaMongameli Mugabe, okucatshangelwa ukuthi wadla itshefu engakayi emhlanganweni webandla leli eGwanda.

Abafole besekela uNkosikazi Mugabe kukhanya engani bakucele leZanu PF elifuna ukuthi uNkosikazi Mugabe athathe isikhundla somkakhe isikhathi singafika.

UChimene uhle wakubeka sobala ukuthi ngamanga aluhlaza tshoko ukuthi uMnangagwa wafakelwa itshefu ekudleni ngamalunga ecele lika Nkosikazi Mugabe elibizwa ngokuthi yiGeneration 40.

Ophethe uhlangothi lwezokuhlelwa kwenhlelo ebandleni le Zanu PF (Secretary for Admnistration) enguye njalo umphathintambo wezenzakala elizweni (Home Affairs), uMnu. Ignatious Chombo, uxwayise abalandeli bebandla leZanu PF ukuthi bazithinte njalo uthe amapholisa kumele abophe abazafola okungelangqondo.

Uphinde wathi uzulu kumele ayekele ukuthuka uNkosikazi Mugabe endaweni ezinjengobulembu bokuzilibazisa obeFacebook.

UNkosikazi Mugabe ucatshangelwa ukuthi watshaya uNkosazana Engels ngesikhathi ekwele South Africa lapho amapholisa azama ukuthi azilethe enkambeni ukwenzela ukuthi kulungiselelwe ukuthonisa icala lakhe.

Wacina ecatshiswa ngaphansi kweziqondiso zokuvikela inkokheli yakwamanye amanzwe ngaphansi kwalokho okubizwa ngokuthi yi-diplomatic immunity.

Wenelisa ukuphuma kwele South Africa esehamba lomkakhe watshiya abantu bezonde okumangalisayo elizweni lelo ababesithi kumele athoniswe icala lokutshaya untombazana ongenzanga lutho.

Okwamanje uNkosazana Engels ubuphisa uNkosikazi Mugabe esithi kwakungamelanga aphiwe idiplomatic immunity.

Facebook Forum

XS
SM
MD
LG